“Hokimlarga pul ishlatishni o‘rgatish kerak. Ko‘plari tayyor mablag‘ni ishlatishni bilmaydi” — Shavkat Mirziyoyev

Shavkat Mirziyoyev raisligida 10-yanvar kuni sanoatda ishlab chiqarish hajmining o‘sish sur’atlarini ta’minlash, mavjud imkoniyatlar va yangi zaxiralarni safarbar etish chora-tadbirlari yuzasidan videoselektor yig‘ilishi o‘tkazildi. Bu haqda prezident matbuot kotibi xabar qildi.

Qayd etilishicha, sanoat o‘sishi uchun yangi imkoniyatlar va qo‘shimcha moliyaviy resurslar beriladi.

Birinchidan, bank normativlari qayta ko‘rib chiqilib, tijorat banklarida korxonalarga kredit ajratish uchun qo‘shimcha 55 trillion so‘m resurslar ta’minlanadi. Bu – o‘rtacha bitta tumanda 20 million dollarlik investitsiyaga qo‘shimcha resurs, degani.

“Eng avvalo, tijorat banklari bilan birga hokimlarni bu pullarni ishlatishga o‘rgatish kerak. Ko‘p tuman hokimlari tayyor mablag‘ni ishlatishni hali bilmaydi” — deya ta’kidlagan Shavkat Mirziyoyev.

Shu munosabat bilan har bir tuman bo‘yicha qo‘shimcha loyihalar va ularning “yo‘l xaritasi”ni ishlab chiqish, avval ishga tushgan 807 ta loyiha hamda past quvvatda ishlayotgan 271 ta korxonani aylanma mablag‘ bilan ta’minlashga topshiriq berilgan.