Andijonda korrupsion holat yuzaga kelishiga e’tiborsiz bo‘lgan tez tibbiy yordam xizmati mas’ullari ishdan olindi, deb xabar bermoqda Sog‘liqni saqlash vazirligi matbuot xizmati.
Qayd etilishicha, ijtimoiy tarmoqlarda Respublika tez tibbiy yordam markazi Andijon filialining kadrlar bo‘limi inspektori J.M. pora olayotgan vaqtda qo‘lga olingani haqida xabarlar tarqaldi.
Mazkur holat vazirlik tomonidan o‘rganilganda, J.M. 2022-yil 25-dekabrdan Respublika tez tibbiy yordam markazi Andijon hududiy filialining kadrlar bo‘limida inspektor sifatida ish boshlagani aniqlangan.
U 2023-yil 7-yanvar kuni soat 13:00 lar atrofida Andijon shahrining “Soy” mahallasi hududidagi dorixona oldida fuqaroni ishga olib kirib qo‘yish evaziga undan 400 dollarini olayotgan paytda huquq-tartibot organlari xodimlari tomonidan qo‘lga olingan.
Hozir mazkur voqea yuzasidan dastlabki tergov harakatlari olib borilmoqda.
Vazirlik tomonidan ushbu holat o‘rganilib, e’tiborsizligi oqibatida korrupsiyaviy holat sodir etilishiga sharoit yaratib bergani, muassasa xodimlari o‘rtasida yetarlicha tushuntirish ishlarini olib bormagani uchun Respublika tez tibbiy yordam markazi Andijon filiali direktori I. A. va kadrlar bo‘limi boshlig‘i E.X. egallab turgan lavozimidan ozod etildi.
Izoh (0)