Namangan va Navoiy viloyatlarida aksiz markasiz tamaki mahsulotlari muomalaga kiritilishining oldi olindi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Navoiy viloyat boshqarmasi tomonidan IIB va Bojxona boshqarmasi xodimlari bilan hamkorlikda tezkor tadbir o‘tkazilgan. Unda Karmana tuman “Oqtosh” YPX maskanida Isuzu yuk avtotransport vositasi hamda Yutong avtobusi to‘xtatilib ko‘zdan kechirilgan.
Natijada fuqaro M.M. 6 830 quti Milano London nomli aksiz markasiz tamaki mahsulotlarini hamda fuqaro F.O. jami 4 870 quti “Milano” va “Oris” nomli aksiz markasiz tamaki mahsulotlarini Buxoro va Navoiy viloyatlarida o‘tkazish maqsadida olib kelayotgani aniqlangan. Mahsulotlar ashyoviy dalil sifatida olingan.
Shuningdek, departamentning Yangiqo‘rg‘on tuman bo‘limi tomonidan harbiy qism xodimlari bilan hamkorlikda tezkor tadbir o‘tkazilgan. Unda “Mamay” MFY hududida fuqaro J.N. boshqaruvidagi Lada avtotransport vositasida 7 000 quti “Milano” nomli aksiz markasiz tamaki mahsulotlarini Yangiqo‘rg‘on tumanida o‘tkazish maqsadida olib kelayotgani aniqlanib, ashyoviy dalil sifatida olingan.
Holatlar yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)