Bosh prokuratura huzuridagi departament Buxoro va Farg‘ona viloyatlarida o‘qishni ko‘chirib berish bilan firibgarlik holatlariga chek qo‘ydi.
Departamentning Buxoro viloyat boshqarmasi tomonidan o‘tkazilgan tezkor tadbirda muqaddam firibgarlik jinoyati uchun sudlangan S.M. fuqaro J.S.ning o‘qishini go‘yoki yuqori lavozimda ishlovchi tanishlari yordamida qo‘shni Qozog‘iston Respublikasi Chimkent davlat universitetidan Buxoro muhandislik texnologiya institutiga ko‘chirib berish evaziga 3 ming dollarni olgan vaqtida ashyoviy dalillar bilan ushlangan.
Farg‘ona viloyat boshqarmasi tomonidan o‘tkazilgan tergovga qadar tekshiruvda, fuqaro K.M. fuqarolar F.T. va N.B.ning Qirg‘iziston va Tojikiston Respublikalaridagi o‘qishlarini Farg‘ona davlat universitetiga ko‘chirib berish evaziga jami 3 650 AQSH dollarini qo‘lga kiritganligi aniqlanib, shundan 200 AQSH dollari va 1 mln so‘mni qaytarganligi protsessual tartibda rasmiylashtirilgan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)