Farg‘ona viloyatining Farg‘ona va Quvasoy shaharlarida giyohvand moddalar sotish bilan shug‘ullangan shaxslar ushlandi. Bu haqda viloyat Ichki ishlar boshqarmasi xabar qildi.
Qayd etilishicha, 8-yanvar kuni Farg‘ona shahri IIB xodimlari tomonidan tezkor tadbir o‘tkazilgan. Tadbir davomida A.Qodiriy ko‘chasida B.M ismli ayol gashish giyohvand moddasini 200 ming so‘m evaziga sotgan vaqtida ashyoviy dalillar bilan ushlangan.
Holat yuzasidan Uchko‘prik tumani IIB huzuridagi tergov bo‘limi tomonidan Jinoyat kodeksining 276-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) 2-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
Jinoyat kodeksining 276-moddasi 2-qismida ko‘rsatilgan jinoyatni sodir etgan shaxs 5 yilgacha ozodlikdan mahrum qilish bilan jazolanishi mumkin.
Quvasoy shahrida taqiqlangan giyohvandlik vositalarini sotgan shaxs qo‘lga tushdi.
Bundan tashqari, shu kuni Quvasoy shahar IIB xodimlari tomonidan ham tadbir o‘tkazilgan. Unda B.D. ismli shaxs “Mirzalar” mahallasi hududida 1 million so‘m evaziga 1 dona yumaloq shakldagi gashish giyohvandlik moddasini sotgan vaqtida, tadbir ishtirokchilari tomonidan ushlanib, daliliy ashyolar tariqasida olingan.
Holat yuzasidan Quvasoy shahar IIB huzuridagi tergov bo‘limi tomonidan Jinoyat kodeksining 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) 5-qismi bilan jinoyat ishi qo‘zg‘atilib, protsessual tartibda ushlangan.
Jinoyat kodeksining 273-moddasi 5-qismida ko‘rsatilgan jinoyatni sodir etgan shaxs yigirma yilgacha ozodlikdan mahrum qilish bilan jazolanishi mumkin.
Izoh (0)