Фарғона вилоятининг Фарғона ва Қувасой шаҳарларида гиёҳванд моддалар сотиш билан шуғулланган шахслар ушланди. Бу ҳақда вилоят Ички ишлар бошқармаси хабар қилди.
Қайд этилишича, 8 январь куни Фарғона шаҳри ИИБ ходимлари томонидан тезкор тадбир ўтказилган. Тадбир давомида А.Қодирий кўчасида Б.М исмли аёл гашиш гиёҳванд моддасини 200 минг сўм эвазига сотган вақтида ашёвий далиллар билан ушланган.
Ҳолат юзасидан Учкўприк тумани ИИБ ҳузуридаги тергов бўлими томонидан Жиноят кодексининг 276-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) 2-қисми билан жиноят иши қўзғатилган. Ҳозирда тергов ҳаракатлари олиб борилмоқда.
Жиноят кодексининг 276-моддаси 2-қисмида кўрсатилган жиноятни содир этган шахс 5 йилгача озодликдан маҳрум қилиш билан жазоланиши мумкин.
Қувасой шаҳрида тақиқланган гиёҳвандлик воситаларини сотган шахс қўлга тушди.
Бундан ташқари, шу куни Қувасой шаҳар ИИБ ходимлари томонидан ҳам тадбир ўтказилган. Унда Б.Д. исмли шахс «Мирзалар» маҳалласи ҳудудида 1 миллион сўм эвазига 1 дона юмалоқ шаклдаги гашиш гиёҳвандлик моддасини сотган вақтида, тадбир иштирокчилари томонидан ушланиб, далилий ашёлар тариқасида олинган.
Ҳолат юзасидан Қувасой шаҳар ИИБ ҳузуридаги тергов бўлими томонидан Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилиб, процессуал тартибда ушланган.
Жиноят кодексининг 273-моддаси 5-қисмида кўрсатилган жиноятни содир этган шахс йигирма йилгача озодликдан маҳрум қилиш билан жазоланиши мумкин.
Изоҳ (0)