Amazon asoschisi o‘z boyligining katta qismini xayriya qilmoqchiligini ma’lum qildi

Dunyoning eng boy odamlaridan biri, Amazon asoschisi Jeff Bezos boyligining katta qismini xayriya ishlariga berish niyatida ekanligini ma’lum qildi. Bu haqda Forbes xabar bermoqda.

Biznesmenning boyligi 124 milliard dollarga baholanmoqda, u Forbes global ro‘yxatida to‘rtinchi o‘rinda. 2021-yilgi reytingda u dunyodagi eng boy biznesmen bo‘lgan edi.

U sarflashni rejalashtirayotgan kapitalning aniq ulushini va pulni oluvchilarni ro‘yxati haqida axborot berishdan bosh tortdi.

Bezosning ta’kidlashicha, u tirikligida pul xayriya qilish niyatida, bu mablag‘ vasiyat sifatida ajratilmaydi.

Ma’lumotlarga ko‘ra, Bezos yana ikki milliarder, Microsoft asoschisi Bill Geyts va Berkshire Hathaway bosh direktori Uorren Baffet tomonidan tashkil etilgan The Giving Pledge dasturiga qo‘shilmagani uchun tanqid qilingan.

Bezos o‘zining Bezos Earth Fund xayriya jamg‘armasiga ega bo‘lib, tadbirkor 10 yil davomida 10 milliard dollar xayriya qilgan, bu uning hozirgi boyligining qariyb 8 foizini tashkil etadi.

Bezosning sobiq rafiqasi Makkenzi Skott 2019-yilda The Giving Pledge’ga qo‘shilgan edi. Endi u Forbes Real-Time ayollar reytingida beshinchi o‘rinni egallab turibdi, uning boyligi 29,8 milliard dollarga baholanmoqda.

Avvalroq Forbes eng boy amerikaliklar ro‘yxatini e’lon qilgani haqida xabar berilgandi.