Xorazm viloyati Ekologiya boshqarmasi xodimlarining ov jarayonida aks etgan suratlari yuzasidan xizmat tekshiruvi tayinlangani ma’lum qilingan edi. Tabiat resurslari vazirligi matbuot xizmati tekshiruv natijalarini e’lon qildi.
Aniqlanishicha, 2019-yilning yanvarida Yangibozor tumanida I.Qo‘chqorov o‘ziga tegishli ov quroli va ov qilish guvohnomasi bilan ovga chiqqan, biroq u tegishli tartibda ov qilish yo‘llanmasini olmasdan, ikki bosh yovvoyi churrakni ovlagan.
Shuningdek, o‘rganishlar jarayonida shu kuni J.Sobirov va N.Olloberganov Yangibozor tumani hududida reyd tadbirini amalga oshirayotgan vaqtida voqea joyida I.Qo‘chqorovni uchratib, ular birga suratga tushgani, ammo inspektorlar tomonidan ushbu qonunbuzilish holati yuzasidan tegishli tartibda hech qanday chora ko‘rilmagani aniqlandi.
Hozirda I.Qo‘chqorov ekologiya tizimida ishlamaydi. U bilan tuzilgan mehnat shartnomasi o‘zining xohishiga ko‘ra, 2022-yil 1-noyabrdan bekor qilingan.
Ushbu holat yuzasidan unga nisbatan to‘plangan hujjatlar Ma’muriy javobgarlik to‘g‘risidagi kodeksining 36 va 38-moddalariga asosan ko‘rib chiqish uchun tegishli tartibda rasmiylashtirilib, sud organlariga taqdim etildi.
J.Sobirov va N.Olloberganov o‘z faoliyatini sohaga oid qonun hujjatlari, nizom va lavozim yo‘riqnomasida belgilangan vakolatlari doirasida amalga oshirmagani qonuniy tartibda ko‘rib chiqilib, ular egallab turgan lavozimidan ozod etish to‘g‘risida qaror qabul qilindi.
Izoh (0)