Ijtimoiy tarmoqlarda Qashqadaryo viloyati Ko‘kdala tumanida ikki yoshli qizaloq noto‘g‘ri emlangani sababli falaj bo‘lib qolgani to‘g‘risida xabar tarqaldi. Viloyat Sog‘liqni saqlash boshqarmasi holatga munosabat bildirdi.
Qayd etilishicha, vaziyat yuzasidan xodimlar tomonidan xizmat tekshiruvi o‘tkazilgan. Aniqlanishicha, Ko‘kdala tumani “Naymansaroy” mahallasida yashovchi F.S. (2020-yilda tug‘ilgan) mazkur mahalladagi Galabek oilaviy shifokor punktida ro‘yxatda turadi. Respublika bolalar milliy tibbiyot markazida unga “o‘tkir bo‘shashgan shol, Giyen-Barre sindromi” tashxisi qo‘yilgan. Mazkur kasalliklar kelib chiqish sababini aniqlash uchun epidemiologik surishtiruv o‘tkazilib, bemorning tibbiy emlash va rivojlanish kartalari o‘rganilgan.
Galabek oilaviy shifokor punktida 6 oylikdan 5 yoshgacha bo‘lgan bolalar uchun 730 doza qizamiq va qizilchaga qarshi vaksina olingan. 700 nafar bolada mazkur turdagi emlashlar o‘tkazilgan. Emlangan bolalar bo‘yicha surishtiruv olib borilganida ularning hech birida emlashdan keyingi nojo‘ya ta’sirlar kuzatilmagani ma’lum bo‘lgan. Shular qatorida bemor F.S. 2022-yil 23-noyabr kuni shifokor ko‘rigidan keyin shamollash belgilari bo‘lmagani sababli emlashga ruxsat berilgan. Bolaning otasining so‘zlariga ko‘ra, emlashdan so‘ng kechasi bemorning harorati ko‘tarilgan. Avvaliga xususiy shifoxona, so‘ng Chiroqchi tumani tibbiyot birlashmasi mutaxassisi tomonidan berilgan tavsiyalar asosida uy sharoitida davo muolajalari qilingan.
Ahvoli yaxshilanmagach, Samarqanddagi shifoxonada davolanish davom ettirilgan. Ijobiy o‘zgarish kuzatilmagani sababli respublika bolalar milliy tibbiyot markazida tekshiruvdan o‘tkazilib, yuqorida qayd etilgan tashxis asosida muolajalar qilingan. Yaxshi tomonga o‘zgarish bo‘lganidan keyin uyiga javob berilgan.
Respublika sanitariya-epidemiologik osoyishtalik va jamoat salomatligi xizmati virusologiya xizmati laboratoriyasi tomonidan 2022-yil 21-dekabrda olib kelingan bemor F.S.ga tegishli material o‘tkir bo‘shashgan shol kasalligiga tekshirilganida manfiy natija qayd etilgan. Ya’ni bolada bu kasallikni keltirib chiqaruvchi poliomiyelit va enteroviruslar aniqlanmagan.
O‘rganish xulosalariga ko‘ra, bemorda kuzatilgan kasallik emlash asorati emasligi aniqlangan. Tashxis: “o‘tkazilgan neyroinfeksiya asorati pastki paraparez”.
“Ayni paytda bola viloyat sog‘liqni saqlash boshqarmasi nazoratiga olinib, uy sharoitida parvarishlanmoqda, unda ijobiy tomonga o‘zgarish kuzatilmoqda”, — deyiladi xabarda.
Izoh (0)