O‘zbekistonda 2016-yilda gemodializ xizmatini ko‘rsatuvchi bo‘limlar soni 29 ta bo‘lgan bo‘lsa, hozirga kelib 65 taga yetkazilgan. Viloyat markazlaridan tashqari mamlakatning faqatgina 2 ta tumanida bo‘lgan ushbu xizmat 2022-yilga kelib, 23 ta tumanda yo‘lga qo‘yildi. Gemodializ uskunalari miqdori esa 240 tadan 690 taga ortdi.
“Daryo” muxbiri Respublika ixtisoslashtirilgan nefrologiya va buyrak transplantatsiyasi ilmiy-amaliy tibbiyot markazida bo‘lib, bemorlarga ko‘rsatilayotgan gemodializ xizmati haqida material tayyorladi.
Sog‘liqni saqlash vazirligi gemodializ xizmati bosh mutaxassisi Sobit Azizovning aytishicha, prezident Shavkat Mirziyoyevning 2018-yildagi va 2021-yildagi ikkita tegishli qarori bilan aholiga gemodializ yordamini ko‘rsatish samaradorligi keskin oshgan.
“Avvallari Respublika bo‘yicha 242 ta sun’iy buyrak apparati, 30 ta suv tozalash moslamasi, 10 konsentratorlarni tayyorlash uchun mikserlar mavjud bo‘lgan. Prezidentimizning ushbu sohaga qaratgan e’tiborlaridan keyin bu ko‘rsatgichlar karrasiga ortdi. Masalan, sun’iy buyrak apparati 690 taga, sun’iy buyrak bo‘limlari esa 65 taga yetdi”, — dedi mutaxassis.
Uning alohida ta’kidlashicha, sun’iy buyrak apparatiga tushuvchi bemorlar uchun ishlatiladigan filtrlar bir necha marotaba qayta ishlatilgan bo‘lsa, Prezident qarori bilan filtrlarni bir martalikka o‘tkazilishi gemodializ xizmati sohasidagi katta burilishlari bo‘lgan.
“Ilgari gemodializ seansiga tushuvchilar ro‘yxati tuzilar edi va bunga majyuur bo‘lganmiz. Boisi barcha bemorlarni qamrab olishga imkoniyatimiz yetmasdi, o‘rinlar yo‘q edi. Hozirga kelib esa buyragi ishlamaydigan bemorlar hech qanday monelik yo‘q. Shuningdek, gemodializ seansi uchun foydalaniladigan 14 turdagi vositalar davlat tomonidan beg‘araz ta’minlab berilmoqda. Yana bir jihati bu turdagi bemorlar uchun 5 turdagi dori vositalari bemorlarning yashash manzili bo‘yicha bepul berilmoqda. Bu ham bemorlaring yashash muddatini uzaytiradi, ish faoliyatini yaxshilaydi, ular o‘zlarini jamiyatga kerakli, deb his qiladi”, — dedi Sobit Azizov.
Qoraqalpog‘iston, Xorazm viloyati va Toshkent shahrida 1 100 nafar bemorga gemodializ xizmatini ko‘rsatish bo‘yicha Hindistonning Nephrocare Health Services Central Asia kompaniyasi bilan davlat-xususiy sheriklik asosidagi bitim imzolangan edi. Unga ko‘ra, 2022-yil aprel oyida Nukus shahrida 150 nafar bemorga xizmat ko‘rsatuvchi yangi gemodializ klinikasi faoliyati yo‘lga qo‘yilgan.
Nukus shahridagi Nephroplyus gemodializ markazi shifokori Maxsetbay Matchanovning “Daryo”ga ma’lum qilishicha, markaz Prezident farmoniga asosan O‘zbekiston va Hindiston o‘rtasida davlat xususiy sherikchiligi asosida faoliyatini boshlagan.
“Bu kabi gemodializ markazlari dastlab Toshkent shahri, Qoraqalpog‘iston Respublikasi va Xorazm viloyatlarida ish boshlagan. Shular orasida birinchilardan bo‘lib Nephroplyus gemodializ markazi 2022-yilning aprel oyida Nukus shahrida ochildi.
Oldinlari davlat shifoxonalarida gemodializ markazlari bor edi. Biroq bu markazlar yildan yilga bemorlarning soni ko‘paygani hisobiga va gemodializ uskunalarining kamligi bois talab yuqoriligicha qolmoqda edi. Har bir bemor buyrak yetishmovchiligining terminal bosqichida gemodializ seansini haftasiga 8-12 soat olishi kerak bo‘ladi. Oldinlari bu darajada muolaja olishning imkoni yo‘q edi. Sababi bemorlar soni ko‘paygan, uskunalar esa kam edi.
Bu yerda 34 ta gemodializ uskunasi to‘liq ishlab turibdi. To‘liq ravishda 150 nafargacha bemorlarni qabul qila olamiz. Hozirda 90 nafar bemorimiz to‘liq dializ muolajalarini olmoqda.
Biz markazimizga kelgan bemorlarga bemor deb emas, mehmon deb murojaat qilamiz. Bu ularga psixologik jihatdan biroz bo‘lsa ham kuch beradi. Mehmonlarimiz o‘zlarini bu yerda o‘z uylaridagidek his qilishiga harakat qilamiz. Ular faqat o‘z vaqtida dializ muolajalarini olsa bas”, — dedi Maxsetbay Matchanov.
Izoh (0)