Россиялик миллиардер Роман Абрамовичнинг бир қанча декларация қилинмаган мол-мулки бор. Бунга бизнесменнинг оффшор компаниялари ва траст фондлари орқали рўйхатдан ўтган камида ўнта яхта ва қайиқлари киради. Бу ҳақда Коррупция ва уюшган жиноятчиликни тергов қилиш маркази маълумотларига таяниб Forbes хабар бермоқда.
Бу бойликлардан ташқари миллиардернинг умумий қиймати камида 1 миллиард доллар бўлган олтита яхтаси борлиги маълум, дея қайд этади нашр.
Forbes маълумотларига кўра, Роман Абрамовичнинг саккизта қайиғи ҳозир Туркиянинг Бодрум шаҳрида жойлашган 427 миллион долларлик Eclipse мегаяхтасига хизмат кўрсатиш учун ишлатилади.
Нашр Kewpie’ни декларация қилинмаган яхталар ичида энг қиммати деб атаган. Унинг нархи тахминан 3 миллион долларга баҳоланмоқда.
Кема Бермуд оролларида рўйхатга олинган ва Францияда жойлашган. Шунингдек, миллиардернинг Умбра А қайиғи борлиги маълум бўлди. Унинг тахминий нархи 1 миллион долларни ташкил қилади.
6 январь куни The Guardian газетаси Украинада махсус операция бошланишидан уч ҳафта олдин Абрамович ўнта махфий оффшор трестини қайта ташкил этгани ҳақида хабар берган эди.
Бенефисиарлар миллиардернинг фарзандлари эди. Бу активлар камида 4 миллиард долларга тенг. Роман Абрамович ўз активларини Ғарб ҳукуматлари Украинада қуролли можаро юзага келган тақдирда россиялик олигархларга нисбатан санкциялар қўллаш режалари ҳақида огоҳлантирганидан бир неча кун ўтиб топширди.
Махсус операция бошланишидан аввал Роман Абрамовичнинг бойлиги 18 миллиард долларга баҳоланган эди.
Март ойида у Европа Иттифоқи ва Буюк Британия санкциялари остида қолди. Декабрь ойида Канадада миллиардернинг 26 миллион долларлик активларини ҳибсга олиш ва мусодара қилиш жараёни бошланди.
Forbes’нинг 2022 йил охиридаги ҳисоб-китобларига кўра, Абрамовичнинг бойлиги тахминан 8 миллиард долларни ташкил қилади.
Мавзуга доир:
Изоҳ (0)