Эрон бош прокурори Муҳаммад Жафар Монтазери ҳуқуқ-тартибот идоралари ходимларига ҳижоб ўраш қоидалари бузилишига қарши курашни кучайтиришни буюрди. Бу ҳақда Al-Arabia хабар берди.
Полиция томонидан ҳижобнинг оммавий ечилиши қатъий бостирилиши керак. Ҳуқуқ-тартибот идоралари ходимлари ҳижобни нотўғри ўраганларни қўлга олиб, уларни жавобгарликка тортишга мажбур. Аёлларга ислом жиноят кодексига мувофиқ жаримадан ташқари, ўн кундан икки ойгача қамоқ жазоси ҳам белгиланган.
Бундан ташқари, уларга нисбатан қўшимча маъмурий чоралар, хусусан, давлат хизматидан бўшатиш, сургун қилиш, мамлакатдан чиқиб кетиш ва мухолифат ташкилотлари билан алоқада бўлишни тақиқлаш, мулкини мусодара қилиш кабилар қўлланилиши мумкин.
«Бошқаларни ҳижоб ўрашдан бош тортишга ишонтирган ва ундаганларни янада оғирроқ жазо кутмоқда», — дейилади хабарда. Улар бир йилдан 10 йилгача қамоқ жазосига ҳукм қилиниши мумкин.
Эронда 2022 йил сентябрь ойи охирида 22 ёшли Маҳса Аминий ҳижобни «нотўғри» ўрагани учун ахлоқ полицияси томонидан ҳибсга олинганидан кейин вафот этиши ортидан норозилик намойишлари бошланган. Тартибсизликлар чоғида хавфсизлик ходимлари томонидан 450 дан ортиқ одам ўлдирилган. Камида 100 намойишчи ўлимга ҳукм қилинган. Мамлакатда икки ўсмир ҳам намойишлар сабабли ўлимга ҳукм қилиниши мумкин.
Изоҳ (0)