Исроил ҳукумати Ғазо сектори билан чегарада бетон панжара ўрнатишга киришди. Бу ҳақда Исроил мудофаа кучларига таяниб, Times of Israel хабар берди.
Мудофаа вазирлигига кўра, чегарага яқин аҳоли пунктлари хавфсизлигини таъминлаш мақсадида шундай чора кўрилмоқда. 4 январь куни панжара ўрнатилиши биринчи тош қўйиш маросими бўлиб ўтган. Деворнинг умумий узунлиги 4,6 километрни ташкил қилади. Ҳарбийларга кўра, у иккита магистрал бўйлаб қурилади.
Қурилиш ҳудудида маҳаллий аҳолига қулайлик яратиш мақсадида велосипед йўллари ҳам ётқизилади. Лойиҳа «Хавфсиз йўл» деб номланди. Қурилиш 2023 йил ёзда якунланиши кутилмоқда, унга қанча маблағ сарфланиши ошкор қилинмаган. The Times of Israel нашрига кўра, тўсиқдан асосий мақсад Ғазо сектори томонидан учирилган танкка қарши ракеталардан ҳимоя қилиш ҳисобланади.
Эслатиб ўтамиз, 3 январь куни Исроил миллий хавфсизлик вазири Итамар Бен-Гвир Шарқий Қуддусдаги Ал-Ақсо масжидига борди, бу АҚШ, Фаластин ва бир қанча араб давлатлари, жумладан, Исроил билан тинчлик шартномасини имзолаган давлатлар томонидан қораланди.
Фаластин Ташқи ишлар вазирлиги «экстремист вазир Бен-Гвир томонидан Ал-Ақсо масжидига бостириб киришни кескин қоралади ва буни мисли кўрилмаган провокация, можаронинг хавфли авж олиши» деб баҳолади. Исроил билан тинчлик шартномасига эга бўлган Иордания, Миср ва Бирлашган Араб Амирликлари Бен-Гвирнинг Ал-Ақсонга «босқин» қилганини қоралади.
Изоҳ (0)