Республикачилар партияси етакчиси Кевин МакКартни АҚШ Конгресси Вакиллар палатаси спикери этиб сайлаш жараёни кетма-кет олтинчи марта муваффақиятсиз якунланди. Вакиллар палатаси аъзолари икки кундан бери спикерни сайлай олмаяпти, деб хабар бермоқда Reuters.
Овоз беришнинг олтинчи раунди якунига кўра, Маккартини 201 нафар республикачи қўллаб-қувватлаган. Унга ғалаба учун 218 та овоз керак.
Республикачилар партиясининг яна бир вакили Байрон Дональдс партиядошларидан 20 та овоз олди. Яна бир республикачи эса аниқ бир номзодни қўллаб-қувватлашдан бош тортди.
Вакиллар палатасидаги демократларнинг барчаси ўз партияси етакчиси Ҳаким Жеффрисга овоз берди.
Олтинчи муваффақиятсиз раунддан кейин конгрессменлар янги овоз беришни 5 январь куни 12:00 га (Тошкент вақти билан 22:00) қолдиришга қарор қилди.
АҚШ президенти Жо Байден вазиятни изоҳлар экан, Вакиллар палатаси спикерини сайлаш жараёни чўзилиб кетганини шармандалик деб билишини, бу муваффақиятсизлик ортидан АҚШ Конгресси қуйи палатасининг фаолияти фалажланганини айтди.
«Конгресс ўз функцияларини бажара олмаётган бу вазият шунчаки шармандалик. Биз дунёдаги энг буюк давлатмиз. Қанақасига бундай бўлиши мумкин?» — деди Байден.
Охирги марта АҚШ Конгресси Вакиллар палатасида биринчи уринишда спикер сайлай олмаслик ҳолати 1923 йилда содир бўлган.
Ноябрь ойида АҚШда оралиқ сайловлар бўлиб ўтганди, унинг натижасида республикачилар Вакиллар палатасида 218 та ўринни эгаллаб, уни назорат қила бошлади. Шундан сўнг Нэнси Пелосининг ўрнига янги спикер танлаш зарурати юзага келди, чунки Пелоси демократлар вакили.
Республикачилар партияси эндиликда АҚШ президенти Жо Байден маъмуриятининг кун тартибига таъсир ўтказиши мумкин бўлади. Олдинги икки йилда Конгресснинг юқори ва қуйи палаталарини назорат қилган демократлар республикачиларнинг розилигисиз ҳам исталган қонун лойиҳасини қабул қила олган.
Изоҳ (0)