Афғонистоннинг Бадахшон вилоятида Абу Умар тахаллусли «Толибон»нинг тожикистонлик аъзоси ўлдириб кетилди. Бу ҳақда Hasht-e Subh Daily хабар берди.
Маълум қилинишича, Абу Умар тажрибали миначи ва «Толибон»нинг чет эллик ёш жангчиларига мураббийлик қилган. У ўлимидан уч кун олдин Бадахшон вилоятининг Баҳорак туманида ғойиб бўлган. Абу Умарнинг жасади 4 январь куни тунда тумандаги қишлоқлардан бирида топилган. Абу Умар қандай ва ким томонидан ўлдирилгани ҳозирча номаълум.
Марҳум Афғонистоннинг шимолий ҳудудлари учун олиб борилган жангларда «Бадахшондаги ҳукумат қўшинларининг ишчи кучи ва ҳарбий техникасини йўқ қилишда муҳим рол ўйнагани» таъкидланади. Абу Умарнинг ўлими ҳақидаги хабарга Тожикистон расмийлари томонидан ҳеч қандай муносабат билдирилмаган. Унинг Хатлон вилоятининг Вахш туманида туғилгани маълум, марҳум ҳақида етарли маълумотлар йўқ.
Айни пайтда ўнлаб «тожик толиблари» Тожикистон билан чегарадош Бадахшон, Баҳорак, Шуғнон ва Нусай туманларида жойлашган. Улардан бири, Нуробод вилоятида туғилган, террорчиликда айбланиб, 9 йилдан бери қидирувда бўлган «Меҳди Арсалан» тахаллусли Муҳаммад Шарифов Афғонистон шимолидаги «Толибон» чегара отрядига қўмондонлик қилади.
Изоҳ (0)