Yangi yil kechasi Ukrainaning Donetsk viloyati Makeyevka shahridagi kasb-hunar bilim yurti binosi HIMARS tizimlari yordamida o‘qqa tutilishi oqibatida 89 nafar rossiyalik harbiy xizmatchi halok bo‘ldi, deya xabar bermoqda Rossiya Mudofaa vazirligi. Avvalroq 63 nafar qurbon haqida ma’lum qilingan edi.
Hodisa sababi sifatida idora harbiylar tomonidan mobil telefonlar qo‘llanilganini aytib o‘tdi. Mudofaa vazirligi Rossiya askarlari halok bo‘lishida aybdor bo‘lgan mansabdor shaxslarni javobgarlikka tortishga va’da berdi.
Rossiya qurolli kuchlari harbiy-siyosiy bosh boshqarmasi boshlig‘i birinchi o‘rinbosari general-leytenant Sergey Sevryukov brifingda ma’lum qilishicha, ikkita HIMARS snaryadlarini havo hujumiga qarshi mudofaa tizimlari tutib qolgan, to‘rtta snaryadni ushlab qolisholmagan, ular bilim yurti binosiga borib tekkan.
Natijada, general-leytenant so‘zlariga ko‘ra, binoning bostirmalari qulab tushgan. Sergey Sevryukovning aytishicha, jabrlanuvchilarni qutqarish uchun “mumkin bo‘lgan barcha choralar” ko‘rilgan. Mudofaa vazirligi qayd etishicha, Ukraina qo‘shinlari Makeyevkaga zarba berishda foydalanilgan HIMARS pusk qurilmasi javob o‘ti bilan yo‘q qilingan.
1-yanvar kuni DXR axborot vaziri o‘rinbosari Daniil Bezsonov Yangil yil kechasi Ukraina qurolli kuchlari safarbar etilganlar bayram dasturxoni atrofida o‘tirgan vaqtda bilim yurti binosiga HIMARS orqali raketalar bilan zarba berganini ma’lum qilgandi. Ertasi kuni bu ma’lumot Rossiya Mudofaa vazirligi tomonidan tasdiqlandi.
Avvalroq AQSHning Urushni tadqiq etish instituti (ISW) Makeyevka shahridagi Rossiya bazasiga 31-dekabr kuni uyushtirilgan zarba Rossiya rasmiylarining keskin tanqidiga sabab bo‘lgani, bu esa prezident Vladimir Putinning obro‘siga putur yetkazishi mumkinligi haqida yozgandi.
Izoh (0)