Rossiya Qrimga yadroviy qurol tashuvchilarini joylashtirdi — Ukraina razvedkasi

Rossiya vaqtincha bosib olingan Qrimda quruqlik, havo va dengizdagi yadroviy qurol tashuvchilarni saqlaydi. Bu haqda Ukraina razvedka boshqarmasi vakili Andrey Chernyakka tayanib, “Ukrinform” xabar berdi.

“Harbiy razvedka ma’lumotlariga ko‘ra, hozirda vaqtincha bosib olingan Qrim hududida yer, havo va dengizdagi yadroviy o‘q-dorilarni tashuvchilar joylashtirilgan. Gap yadroviy o‘q-dorilar bilan zarba bera oladigan kemalar, suv osti kemalari, samolyotlar va quruqlik tizimlari haqida bormoqda. Potensial ravishda Rossiya shunday imkoniyatga ega”, — deydi u.

Chernayk Ukraina harbiy razvedkasi Rossiya yadro qurollarining harakatini taktik darajada kuzatishi va ular qayerda joylashganini bilishini aytdi.

Uning so‘zlariga ko‘ra, Rossiya harbiylari Krasnokamenka posyolkasidagi “Feodosiya-13” inshootida yadro qurolini saqlashga tayyorlash maqsadida ma’lum ishlarni amalga oshirgan, biroq hozircha bu yakunlangani ma’lum emas.

Harbiy razvedka xodimi Rossiya yadroviy zarbasi ehtimoli haqida ham fikr bildirgan. U “Rossiya hamma narsaga qodir”ligini aytib, “Ukraina voqealar rivojining turli variantlarini hisobga olishini” ta’kidlagan.