Germaniya kansleri Olaf Shols Rossiya prezidenti Vladimir Putin bilan Ukrainadagi urush masalasida vaqti-vaqti bilan muloqotda bo‘lib turibdi. Bu haqda Germaniya hukumati vakili o‘rinbosari Kristiane Xoffman Deutsche Welle’ga ma’lum qilgan. Uning so‘zlariga ko‘ra, Rossiyaning boshqa yevropalik siyosatchilar bilan ham diplomatik aloqalari bor.
“Rossiya bilan aloqalar va muloqotlar yo‘q, deb hisoblash noto‘g‘ri bo‘lgan bo‘lardi. Bilasizki, federal kansler ham, Yevroittifoqdagi boshqa siyosatchilar ham prezident Putin bilan hadeb to‘g‘ridan to‘g‘ri aloqa o‘rnatmoqda. Boshqa darajalarda ham, albatta muloqot saqlanmoqda. Bu sohada jimjitlik hukm surmoqda, deb o‘ylash — noto‘g‘ri”, — dedi u.
Ayni vaqtda Germaniya Tashqi ishlar vazirligi rasmiy vakili Kristian Vagner aytishicha, Rossiya tomonidan tinchlik haqidagi muzokaralar bo‘yicha ishonchli takliflar kelib tushmayapti.
“Buni so‘nggi kunlardagi ancha shafqatsiz bombardimonlar ham ko‘rsatdi. Shunday ekan, Rossiyaning bu xatti-harakatlari juda aniq manzarani hosil qiladi”, — dedi u.
Avvalroq Shols Putinning urushdan ko‘zlagan maqsadi haqida gapirgan edi.
Kansler Putin bilan Ukrainadagi urushni bir necha bor telefon orqali muhokama qilgani, ularning so‘nggi suhbati bir soat davom etgani va 2-dekabr kuni bo‘lib o‘tganini aytdi. Siyosatchi Putinning pozitsiyasi o‘zgarishsiz qolayotganini qo‘shimcha qildi.
“Men har gal Putin bilan gaplashsam, u juda aniq nimanidir zabt etish haqida gapiradi. U Ukraina hududining bir qismini kuch bilan egallab olmoqchi, xolos”, — deydi Shols.
Izoh (0)