Xitoy 8-yanvardan mamlakatga kirib keluvchilar uchun karantinni bekor qiladi. Bu haqda Reuters XXR Sog‘liqni saqlash milliy komissiyasiga tayanib xabar bermoqda.
Xitoyga kirib keluvchilarning ko‘pchiligi uchun karantin koronavirus pandemiyasi boshidan buyon saqlanib kelmoqda. Uni 2022-yil kuzidagina yumshata boshlashdi va karantin muddatini o‘n kundan sakkiz kungacha qisqartirishdi.
Xitoyga kirishda karantin to‘liq bekor qilinganidan keyin ham avvalgidek, so‘nggi 48 soat ichida olingan koronavirus testi natijasini taqdim etish kerak bo‘ladi.
Xitoy qariyb uch yil mobaynida koronavirusga nisbatan “nol bardoshlilik” siyosatiga amal qilib, aholi uchun qat’iy cheklov choralarini, shu jumladan, ommaviy lokdaunlarni saqlab keldi. 2022-yil noyabrida bu katta ko‘lamli norozilik aksiyalarini keltirib chiqardi, shundan keyin Xitoy hukumati koronavirusga qarshi choralarni bekor qila boshladi.
Cheklovlarning yumshatilishi, aftidan, kasallanish holatlari keskin ko‘payishiga olib keldi. 20-dekabr kunining o‘zida 37 million kishi, dekabr boshidan buyon esa — 250 million kishi koronavirusga chalindi, deb yozgan edi Bloomberg 23-dekabr kuni Sog‘liqni saqlash milliy komissiyasi yopiq majlisida aytilgan ma’lumotlarga tayanib.
25-dekabrdan boshlab komissiya koronavirus bo‘yicha kunlik ma’lumotlarni e’lon qilishni to‘xtatdi. Ular 2020-yil yanvaridan buyon har kuni e’lon qilinib kelardi, u yerdagi raqamlar juda kichraytirilgan deb hisoblanilardi. Masalan, 20-dekabr kuni ma’lumotnomada koronavirusga chalinish bilan bog‘liq bor-yo‘g‘i uch mingta yangi holat haqida aytilgandi (Bloomberg versiyasiga ko‘ra — 37 millionta holat).
Xitoyda koronavirusning joriy to‘lqini yanvar oyida o‘z cho‘qqisiga chiqishi kutilmoqda, deb yozadi Bloomberg.
Izoh (0)