O‘zbekistonda hafta davomida qanday ob-havo bo‘lishi ma’lum qilindi

O‘zbekistonning shimoliy hududlariga 2-yanvar kuni  Kavkaz hududlaridan antisiklon kirib kelishi kutilmoqda, deb xabar berdi “O‘zgidromet”.

Qoraqalpog‘iston Respublikasi, Xorazm, Navoiy viloyatlarida ba’zi joylarda yomg‘ir va qor ko‘rinishidagi yog‘ingarchilik bo‘ladi. Respublika bo‘yicha ba’zi joylarda shamol 17-22 metr/sekundgacha kuchayadi. O‘zbekistonning qolgan hududlarida yog‘ingarchilik kutilmaydi.

3-yanvar kuni antisiklon respublikaning barcha hududlarini qamrab oladi, O‘zbekiston bo‘yicha yog‘ingarchilik, tog‘ oldi va tog‘li hududlarda ba’zi joylarda kuchli bo‘ladi. Surxondaryo viloyatida yog‘ingarchilik kutilmaydi. Ba’zi joylarda tezligi 17-22 metr/sekundgacha bo‘lgan shamol esadi. Navoiy, Jizzax viloyatlarining ayrim joylarida 25-30 metr/sekundgacha kuchayishi mumkin. Havo harorati kechasi 2 daraja sovuq — 3 daraja iliq, kunduzi 0-5 daraja iliq bo‘ladi.

4-yanvarda antisiklon chekina boshlaydi. Respublika hududining katta qismida yog‘ingarchilik kutilmaydi, faqat kechasi va ertalab O‘zbekistonning markaziy va sharqiy hududlarida yog‘ingarchilik bo‘lishi saqlanib turadi. Havo harorati kechasi 2 daraja sovuq — 3 daraja iliq, kunduzi 3-8 daraja iliq bo‘ladi.

5-yanvarda respublika bo‘yicha yog‘ingarchilik kutilmaydi. Kunduzi havo harorati 7-12 darajagacha, janubda 15 darajagacha ko‘tariladi. Kechalari 3 daraja sovuq — 2 daraja iliq bo‘ladi.

Haftaning oxiriga kelib, Turkmaniston hududlaridan nam va nisbatan iliq havo massalari kirib kelishi kutilmoqda. 6-yanvarda respublika hududi bo‘yicha ba’zi joylarda yomg‘ir yog‘adi. Havo harorati kechalari 4-7 daraja iliqqacha ko‘tariladi, kunduz kunlari 5-10 daraja iliq atrofida bo‘ladi.

Ushbu kunlarda kechasi va ertalab respublika bo‘yicha ba’zi joylarga tuman tushadi.

Mavzuga doir: Chimyonda ko‘chki xavfi e’lon qilindi