Ўзбекистонда ҳафта давомида қандай об-ҳаво бўлиши маълум қилинди

Ўзбекистоннинг шимолий ҳудудларига 2 январь куни  Кавказ ҳудудларидан антициклон кириб келиши кутилмоқда, деб хабар берди «Ўзгидромет».

Қорақалпоғистон Республикаси, Хоразм, Навоий вилоятларида баъзи жойларда ёмғир ва қор кўринишидаги ёғингарчилик бўлади. Республика бўйича баъзи жойларда шамол 17-22 метр/секундгача кучаяди. Ўзбекистоннинг қолган ҳудудларида ёғингарчилик кутилмайди.

3 январь куни антициклон республиканинг барча ҳудудларини қамраб олади, Ўзбекистон бўйича ёғингарчилик, тоғ олди ва тоғли ҳудудларда баъзи жойларда кучли бўлади. Сурхондарё вилоятида ёғингарчилик кутилмайди. Баъзи жойларда тезлиги 17-22 метр/секундгача бўлган шамол эсади. Навоий, Жиззах вилоятларининг айрим жойларида 25-30 метр/секундгача кучайиши мумкин. Ҳаво ҳарорати кечаси 2 даража совуқ — 3 даража илиқ, кундузи 0-5 даража илиқ бўлади.

4 январда антициклон чекина бошлайди. Республика ҳудудининг катта қисмида ёғингарчилик кутилмайди, фақат кечаси ва эрталаб Ўзбекистоннинг марказий ва шарқий ҳудудларида ёғингарчилик бўлиши сақланиб туради. Ҳаво ҳарорати кечаси 2 даража совуқ — 3 даража илиқ, кундузи 3-8 даража илиқ бўлади.

5 январда республика бўйича ёғингарчилик кутилмайди. Кундузи ҳаво ҳарорати 7-12 даражагача, жанубда 15 даражагача кўтарилади. Кечалари 3 даража совуқ — 2 даража илиқ бўлади.

Ҳафтанинг охирига келиб, Туркманистон ҳудудларидан нам ва нисбатан илиқ ҳаво массалари кириб келиши кутилмоқда. 6 январда республика ҳудуди бўйича баъзи жойларда ёмғир ёғади. Ҳаво ҳарорати кечалари 4-7 даража илиққача кўтарилади, кундуз кунлари 5-10 даража илиқ атрофида бўлади.

Ушбу кунларда кечаси ва эрталаб республика бўйича баъзи жойларга туман тушади.

Мавзуга доир: Чимёнда кўчки хавфи эълон қилинди