Termiz shahrida 26—30-dekabr kunlari O‘zbekiston va Afg‘oniston vakillari o‘rtasida temir yo‘l masalalari yuzasidan uchrashuvlar bo‘lib o‘tdi.
Uchrashuv doirasida ikki tomonlama hamkorlikni rivojlantirish, Afg‘onistonga temiryo‘l orqali yuklarni uzluksiz yetkazish maqsadida Hayraton stansiyasida xizmat ko‘rsatishni yanada takomillashtirish masalalari muhokama qilindi.
Qo‘shni davlat vakillari O‘zbekiston tomonidan afg‘on xalqi uchun ko‘rsatayotgan insonparvarlik yordami, infratuzilmaviy loyihalarda qo‘llab quvvatlashi, xususan, Termiz—Mozori-Sharif—Kobul—Peshovar temiryo‘l loyihasini amalga oshirish bo‘yicha ko‘rsatilayotgan ko‘mak, afg‘on mutaxassislarini o‘qitish va malakalarini oshirish bo‘yicha amalga oshirayotgan samarali ishlarini alohida ta’kidlab, o‘z minnatdorchiligini bildirdi.
“O‘zbekiston temir yo‘llari” AJning “Sogdiana trans” SHK tomonidan Hayraton temiryo‘l stansiyasining tajribasidan kelib chiqib texnik-xizmat ishlariga Afg‘oniston tomonini bosqichma bosqich jalb qilish bo‘yicha harakatlar rejasi kelishib olindi. Shu bilan birga, xalqaro yuk tashuvlarni amalga oshirish “Sogdiana trans” SHK tomonidan davom etishi to‘g‘risida kelishildi. Bo‘lib o‘tgan uchrashuvlar yakuni bo‘yicha ikki mamlakat temiryo‘l ma’muriyati rahbarlari o‘rtasida uchrashuv bayoni imzolandi.
Mavzuga doir: O‘zbekiston Hayraton—Mozori Sharif temiryo‘lini boshqarish huquqidan mahrum bo‘lgani haqidagi xabarlar rad etildi
Izoh (0)