Ijodkorlar tomonidan yillar davomida yaratilgan 1—4-sinf uchun o‘quv qo‘llanmalari davlatga beg‘araz taqdim qilinadi

Xalqaro Press-klubning navbatdagi sessiyasida Xalq ta’limi vazirining birinchi o‘rinbosari Usmon Sharifxo‘jayev yangi avlod darsliklari bilan bog‘liq savollarga javob qaytardi.

Qayd etilishicha, kecha taqdimoti o‘tkazilgan zamonaviy darsliklar ma’lum tashabbuskor guruhlar tomonidan beg‘araz tarzda ishlab chiqilgan va unga hozirgacha budjet mablag‘lari sarflanmagan. Tajriba sinovi yakunlanlangach, darsliklar vazirlik ixtiyoriga bepul beriladi.

“Aslida darsliklarni yaratish va chop etish qismi bor. Ochig‘i, darslikni yaratish uni chop etishdan ko‘ra qiyin va qimmat jarayon. Shu paytga qadar turli sabablar bilan darsliklar mazmuniga yetarli e’tibor berilmagan.

Uni chop etish jarayonlari esa o‘rnatilgan tartibda,“Davlat xaridlari to‘g‘risida”gi qonunga asosan, ochiq va shaffof tenderlar orqali o‘tkaziladi. Buning ochiqligini OAV Moliya vazirligi portali orqali ham kuzatib, kim qancha darslik chop etganini ko‘rishi mumkin”, — deydi Usmon Sharifxo‘jayev.

Shuningdek, mutaxassisning ta’kidlashicha, yangi avlod darsliklari aprobatsiyadan so‘ng Xalq ta’lim vazirligiga bepul beriladi. Yangi darsliklarni chop etish jarayoni ochiq va shaffof bo‘ladi.

Mavzuga doir: Yangi darsliklarning o‘ziga xosligi nimada?