Молдова ҳукумати Украинадаги уруш бошланганидан кейин Россия билан муносабатларни тўхтатган. Бу ҳақда мамлакат президенти Майя Санду Молдова 1 телеканали эфирида маълум қилди.
«Сайловда қатнашган пайтларимизда Россия билан ҳамкорлик ва муносабатларни ривожлантириш тарафдори эдик. Аммо ҳозир Россия раҳбарияти билан барча даражадаги алоқалар тўхтатилган», — деди у. Давлат раҳбарининг айтишича, бу Украинадаги уруш билан боғлиқ.
Сандунинг сўзларига кўра, мамлакатнинг кейинги ўн йилликдаги асосий мақсади Европа Иттифоқига қўшилиш. «Европа интеграцияси – мамлакатимиз лойиҳаси, бизда эркин ва тинч тараққиётни таъминлаш, шу билан бирга, аҳоли турмуш даражасини ошириш учун бошқа имконият йўқ», — деди у. «Ушбу ўн йилликнинг охиригача Европа Иттифоқига аъзо бўлишимиз керак, деб ҳисоблайман».
Молдова Россиянинг Украинадаги ҳарбий амалиётини қоралаган. Бундан ташқари, Молдова ҳукумати можаро уларнинг мамлакатига ҳам таъсир қилиши мумкинлигидан хавотирларини бир неча бор билдирган.
Декабрь ойи ўрталарида Молдова Ахборот ва хавфсизлик хизмати раҳбари Александру Мустяца Россия қўшинларининг Украина орқали Молдова томон ҳаракатланиши хавфини «реал ва жуда юқори» деб атаганди.
Изоҳ (0)