Isroilda Benyamin Netanyaxu boshchiligidagi yangi hukumat qasamyod qildi. Bu haqda Times of Israel xabar berdi.
Bosh vazirlik lavozimiga qaytgan “Likud” partiyasi yetakchisi Benyamin Netanyaxu 33 nafar vazirlar mahkamasi a’zolarini tanishtirdi. Bu Isroil tarixidagi eng o‘ng qanot hukumat hisoblanadi.
“Isroil 37-hukumatining barcha yangi vazirlari allaqachon qasamyod qildi va Knessetning bugungi majlisi yakunlandi”, deyiladi xabarda. Sobiq bosh vazir Yair Lapid yangi hukumat rahbariga qo‘l bermay Knesset yig‘ilishini tark etgan.
Arab dunyosida Isroilning yangi vazirlar mahkamasi tarkibi muhokamaga sabab bo‘ldi, chunki uning tarkibiga milliy xavfsizlik vaziri lavozimini egallab kelayotgan o‘ta millatchi Itamar Ben-Gvir va “Diniy sionizm” partiyasi raisi Bezalel Smotrich ham kiradi.
Ben-Gvir ham, Smotrich ham Falastin davlati mavjudligiga qarshi va Isroil hududini G‘arbiy Sohilning bosib olingan hududlariga kengaytirishga chaqirmoqda. Isroil prezidenti Isaak Gersog ham yangi hukumat tarkibiga shubha bildirgan.
Isroil yangi hukumatining asosiy vazifalari
Benyamin Netanyaxu Knesset a’zolari oldida so‘zlagan nutqida Isroil va arablar o‘rtasidagi mojaroni hal qilish mutlaq ustuvor ahamiyatga ega ekanini aytdi. Muhim vazifalar qatoridan Eronda yadro quroli paydo bo‘lishining oldini olish, Isroilda xavfsizlik bilan bog‘liq vaziyatni yaxshilash, mamlakatda yashash xarajatlarini kamaytirish va tezyurar temir yo‘l liniyasini qurish kiradi.
Netanyaxu muxolifat deputatlarini “saylovchilar irodasini hurmat qilishga va mag‘lubiyatni qabul qilishga” chaqirdi.
Izoh (0)