Rossiyaning “Vkusno — i tochka” restoranlar tarmog‘i O‘zbekiston bozoriga kirishi mumkin

Rossiyaning “Vkusno — i tochka” restoranlar tarmog‘i o‘z brendini O‘zbekiston, MDH mamlakatlari, shuningdek, McDonald’s mavjud bo‘lmagan boshqa xorijiy mamlakatlar bozoriga chiqarish imkoniyatini ko‘rib chiqmoqda. Bu haqda “TASS” xabar bermoqda.

Agar variantlar orasida MDH davlatlari haqida gap borayotgan bo‘lsa, bular Armaniston, O‘zbekiston, Qirg‘izistondir, — dedi restoranlar tarmog‘i bosh direktori Oleg Paroyev.

Uning qo‘shimcha qilishicha, “Vkusno — i tochka” McDonald’s mavjud bo‘lmagan xorijiy mamlakatlarda ham o‘z filiallarini ochishi mumkin.

MacDonald’s mavjud bo‘lmagan mamlakatlarga kelsak, hozir aniq qaysidir davlatlarni ko‘rib chiqyapmiz, deb aytolmayman. Lekin shunday yirik davlatlardan biri Eron, — dedi Paroyev.

Tarmoq egasi Aleksandr Govorga ko‘ra, yangi bozorlarga chiqish franchayzing savdosi orqali amalga oshiriladi.

Paroyevning qo‘shimcha qilishicha, tarmoq uchun yangi bozorlarga kirishdan oldin, 2023-yil davomida amalga oshiradigan ta’minot, logistika uzluksizligini ta’minlash muhim ahamiyatga ega.

Tarmoq bosh direktorining tushuntirishicha, McDonald’s korporatsiyasi bilan kelishuvga ko‘ra, “Vkusno — i tochka” McDonald’s joylashgan bozorlarda ishlay olmaydi.

McDonald’sning 2021-yildagi hisobotiga ko‘ra, korporatsiya brendi dunyoning 119 mamlakatida mavjud.

Avvalroq Rossiyada McDonald’s o‘rnini egallagan restoranlar tarmog‘i — “Vkusno — i tochka” ish boshlagani haqida xabar berilgandi.