McDonald’s Rossiyada “Vkusno — i tochka” nomli brend bilan ish boshladi. Bu haqda “Kommersant” xabar bermoqda.
9-iyun kuni yangi tez ovqatlanish restoranlari tarmog‘ining logotipi taqdim etildi.
Bugun, 12-iyun kuni dastlabki 15 ta restoran ochildi. 13-iyun kuni yana 50 ta restoran o‘z faoliyatini boshlaydi. Kompaniya haftasiga 50 tadan 100 tagacha savdo nuqtalarini ochishni rejalashtirmoqda.
Ma’lum bo‘lishicha, logistika va qadoqlash bilan bog‘liq muammolar tufayli avval tanish bo‘lgan barcha menyular endi mavjud emas.
Restoran menyusidan Big Mac burgerlari va McFlurry muzqaymoqlari olib tashlangan. Yangi menyu ham alkogolsiz bo‘ladi, ammo kompaniya taomlarni mintaqaga qarab moslashtirishni rejalashtirgan. Restoranlardan brendga tegishli havolalar olib tashlanadi.
Ayni paytga kelib Rossiyadagi barcha McDonald’s franshizalari o‘z faoliyatini to‘xtatgan. Ular yangi “Vkusno — i tochka” brendi ostida ish boshlashi mumkin.
Moskva va Sankt-Peterburg aeroportlari va vokzallaridagi McDonald’s restoranlari 2022-yil oxirigacha ishlashda davom etadi.
McDonald’s tarmog‘i Ukrainadagi urushi tufayli 14-mart kuni Rossiyadagi faoliyatini to‘xtatdi. 16-may kuni kompaniya Rossiya bozorini tark etib, mamlakatdagi aktivlarini sotayotganini ma’lum qildi.
10-iyun kuni binezmen Aleksandr Govorga tegishli kompaniya Rossiyadagi McDonald’s aktivlarining egasiga aylandi. U ilgari Sibirda bir nechta franshizalarni boshqargan.
Hisob-kitoblarga ko‘ra, McDonald’s Rossiyani tark etishi tufayli 127 mln dollar yo‘qotgan.
Avvalroq Nike Rossiyadagi biznesini to‘xtatishi haqida xabar berilgan edi.
Izoh (0)