“Beton ishlari tavakkalchilikka asoslangan holda tayyorlangan” — Buxorodagi binoda beton plitalar qulab tushgani bo‘yicha qo‘shimcha ma’lumot berildi

Buxoroda qurilayotgan ko‘pqavatli uyning 7-qavatida beton plitalar qulab tushgandi. Qurilish vazirligi holat yuzasidan qo‘shimcha ma’lumot berdi.

Eslatib o‘tamiz, Buxoroda 7 qavatli uy qulab tushgani haqida xabar ijtimoiy tarmoqlarda tarqalgach, zudlik bilan aytilgan manzilga ixtisoslashgan tashkilotlar mutaxassislari yetib borib, tarqatilgan ma’lumotlar haqiqatga to‘g‘ri kelmasligi, faqat 7-qavatdagi  dona beton plitalar qulab tushgani ma’lum bo‘lgandi.

Qurilish vazirligi matbuot xizmati 7-qavatda to‘sin (rigel)larga tayangan 5 ta plitaning tushib ketishi bilan bog‘liq holatning aniq sabablarini e’lon qildi.

Aniqlanishicha, binoning asosiy yuk ko‘taruvchi konstruksiyasi ramaning to‘sin qismlari mahalliy qum-shag‘al aralashmasidan tayyorlanib, quyma betondan bajarilgan. Beton ishlari qurilish maydonning o’zida qum-sement nisbatiga amal qilinmasdan, tavakkalchilikka asoslangan holda tayyorlangan.

To‘sinlar yetarlicha mustahkamlik darajasiga ega bo‘lmasdan turib, uning ostidagi yog‘ochli tayanch ustunchalari olib tashlangan. O‘rnatilgan plitalarning ustiga ortiqcha yuk berilib, konstruksiyaning zo‘riqishiga sabab bo‘lgan.

Mazkur holat yuzasidan Buxoro viloyati qurilish sohasida hududiy nazorat inspeksiyasi tomonidan qurilish talablari buzilganligi uchun fuqaro A.S. Ma’muriy javobgarlik to‘grisidagi kodeksning 99-moddasiga (shaharsozlik to‘g‘risidagi qonunchilikni buzish) asosan javobgarlikka tortilib, qurilish-montaj ishlari to‘xtatildi.

Mavzuga doir: Toshkentdagi qurilish maydonida kran qulab tushdi