Donetsk va Lugansk xalq respublikalari o‘zining yangi konstitutsiyasini qabul qildi. Bu haqda “RIA Novosti” xabar berdi.
DXR parlamenti hujjatni ikki o‘qishda qabul qildi, uni 76 nafar deputat qo‘llab-quvvatladi. Respublika rahbari vazifasini bajaruvchi Denis Pushilin parlamentda ovoz berishdan oldin, “yangi Rossiya tarixi” yozilishini aytdi.
“Biz tarixiy voqea ishtirokchilarimiz. Asosiy qonun bolalarni oilaviy tarbiyalash ustuvorligini belgilab beradi. Vatanparvarlik va fuqarolik tarbiyasini o‘z ichiga oladi. Biz adolat va vijdon qonunlari asosida yashash huquqi uchun kurashamiz”, — dedi Pushilin.
Yangi konstitutsiyani Lugansk xalq respublikasi xalq kengashi deputatlari ham qabul qildi.
Sentyabrda Lugansk va Donetsk xalq respublikalari, Xerson va Zaporojye viloyatlarini Rossiya tarkibiga qo‘shish bo‘yicha referendumlar o‘tkazilgan. Kremlda 30-sentabr kuni Rossiya tarkibiga “yangi hududlarni” qabul qilish bo‘yicha kelishuvlarni imzolash marosimi bo‘lib o‘tgan.
Ma’lumot o‘rnida, O‘zbekiston Lugansk va Donetsk mustaqilligini tan olmaydi. O‘zbekiston Ukraina va Rossiya atrofidagi vaziyat bo‘yicha “vazmin, neytral pozitsiyada”.
“Mamlakatimiz azaldan ham Rossiya, ham Ukraina bilan yaqin, do‘stona munosabatlarga ega. Biz keng mintaqamizda tinchlik, barqarorlik va izchil taraqqiyot bo‘lishidan manfaatdormiz. Barcha bahs va kelishmovchiliklar faqatgina xalqaro huquq normalari asosida hal qilinishi lozim”, — deya prezident matbuot kotibi Sherzod Asadov Mirziyoyev va Putin o‘rtasidagi telefon muloqoti yuzasidan ma’lumot bergandi.
Izoh (0)