Донецк ва Луганск халқ республикалари ўзининг янги конституциясини қабул қилди. Бу ҳақда «РИА Новости» хабар берди.
ДХР парламенти ҳужжатни икки ўқишда қабул қилди, уни 76 нафар депутат қўллаб-қувватлади. Республика раҳбари вазифасини бажарувчи Денис Пушилин парламентда овоз беришдан олдин, «янги Россия тарихи» ёзилишини айтди.
«Биз тарихий воқеа иштирокчиларимиз. Асосий қонун болаларни оилавий тарбиялаш устуворлигини белгилаб беради. Ватанпарварлик ва фуқаролик тарбиясини ўз ичига олади. Биз адолат ва виждон қонунлари асосида яшаш ҳуқуқи учун курашамиз», — деди Пушилин.
Янги конституцияни Луганск халқ республикаси халқ кенгаши депутатлари ҳам қабул қилди.
Сентябрда Луганск ва Донецк халқ республикалари, Херсон ва Запорожье вилоятларини Россия таркибига қўшиш бўйича референдумлар ўтказилган. Кремлда 30 сентябрь куни Россия таркибига «янги ҳудудларни» қабул қилиш бўйича келишувларни имзолаш маросими бўлиб ўтган.
Маълумот ўрнида, Ўзбекистон Луганск ва Донецк мустақиллигини тан олмайди. Ўзбекистон Украина ва Россия атрофидаги вазият бўйича «вазмин, нейтрал позицияда».
«Мамлакатимиз азалдан ҳам Россия, ҳам Украина билан яқин, дўстона муносабатларга эга. Биз кенг минтақамизда тинчлик, барқарорлик ва изчил тараққиёт бўлишидан манфаатдормиз. Барча баҳс ва келишмовчиликлар фақатгина халқаро ҳуқуқ нормалари асосида ҳал қилиниши лозим», — дея президент матбуот котиби Шерзод Асадов Мирзиёев ва Путин ўртасидаги телефон мулоқоти юзасидан маълумот берганди.
Изоҳ (0)