Rossiya prezidenti Vladimir Putin 30-dekabr kuni Xitoy yetakchisi Si Tszinpin bilan videomuloqot shaklida muzokara o‘tkazdi. Xitoy rahbari Rossiya bilan global hamkor bo‘lishga tayyorligini bildirdi. Bu haqda “RIA Novosti” xabar berdi.
Si Szinpinning so‘zlariga ko‘ra, dunyoda “noaniq” vaziyat yuzaga kelgan, bunda Rossiya va Xitoy strategik hamkorlikni oshirishi kerak. XXR rahbari bu dunyo barqarorligiga olib kelishiga ishonch bildirgan.
“Murakkab, noaniq xalqaro vaziyat sharoitida strategik hamkorlikni yo‘lga qo‘yishga, bir-birimizga rivojlanish imkoniyatlarini taqdim etishga, mamlakatlarimiz xalqlari farovonligi va atrofdagi barqarorlik manfaatlari yo‘lida global hamkor bo‘lishga tayyormiz”, — dedi u.
Shuningdek, Xitoy rahbari Rossiya bilan bir tomonlama harakat siyosatiga qarshi turish va ikki davlat suvereniteti, xavfsizligini himoya qilish uchun hamkorlik qilishga tayyorligini ta’kidladi.
“Xitoy Rossiya va dunyodagi barcha ilg‘or kuchlar bilan gegemonlik va kuch siyosatiga qarshi hamkorlik qilishga, proteksionizm va zo‘ravonlikka qarshi turish, ikki davlat suvereniteti, xavfsizligi va taraqqiyot manfaatlarini qat’iy himoya qilishga tayyor”, — dedi Si Szinpin.
U, shuningdek, Xitoy Rossiya bilan birgalikda xalqaro xolislik va adolatni himoya qilishga tayyor ekanini qayd etdi.
Kreml matbuot kotibi Dmitriy Peskov Putin va Si Szinpin 30-dekabrda muzokara o‘tkazishini aytgandi. U muzokara ochiq va yopiq rejimda o‘tishini ta’kidlab, dolzarb mintaqaviy muammolar muhokama qilinishini aytgan.
Izoh (0)