Qozog‘iston Senati korrupsiyaga qarshi kurash bo‘yicha uchta kodeks va sakkizta qonunga tuzatishlar kiritib, xarajati rasmiy daromaddan yuqori bo‘lgan mansabdorlarni ishdan bo‘shatish to‘g‘risidagi o‘zgartirishni qabul qildi. Bu haqda “Orda.kz” xabar berdi.
Senat “Korrupsiyaga qarshi kurashish va davlat muhofazasiga olingan shaxslar xavfsizligini ta’minlash to‘g‘risida”gi qonun loyihasini qabul qildi. Unga ko‘ra, deklaratsiyalardagi nomuvofiqliklar uchun sanksiyalar belgilandi.
“Mansabdor shaxsning xarajatlari va daromadlaridagi farq 1 000 oylik hisob ko‘rsatkichidan oshsa, ‘fiskal sanksiya’ qo‘llaniladi, ya’ni daromaddagi farqning 90 foizi ma’muriy jarima tariqasida qaytariladi”, — deydi Qozog‘iston Korrupsiyaga qarshi kurash agentligi raisi o‘rinbosari Ulan Sarqulov.
Agar bu farq davlat xizmatchisining yillik daromadidan oshsa, “mansab jarimasi” ko‘rib chiqiladi: shaxsning uch yil davomida davlat xizmatida faoliyat yuritishi bekor qilinadi. Shu bilan birga, har bir holatda mansabdor shaxsga xarajatlarning qonuniyligini asoslash imkoniyati beriladi.
Tasdiqlangan qaror aholini deklaratsiya bilan to‘liq qamrab olishni hisobga olgan holda 2027-yildan kuchga kiradi.
Avvalroq Qozog‘iston parlamenti Nazarboyev to‘g‘risidagi qonunni bekor qilish masalasini ko‘rib chiqayotgani ma’lum qilingan. Mamlakat konstitutsiyasining 46-moddasidan birinchi prezidentning maqomi va vakolatlari konstitutsiya va tegishli konstitutsiyaviy qonun bilan belgilanadi, degan bandni olib tashlash rejalashtirilmoqda. Hozirda Nazarboyevni prezidentlik davrida qilgan harakatlari uchun javobgarlikka tortish mumkin emas. Shuningdek, uni ushlab turish, hibsga olish va qamoqda saqlash, tintuv yoki so‘roq qilish mumkin emas.
Izoh (0)