Qozog‘iston Majilisi (parlamentning quyi palatasi) konstitutsiyaga birinchi prezident Nursulton Nazarboyev to‘g‘risidagi qonunni bekor qiluvchi o‘zgartirishlar kiritishni ko‘rib chiqmoqda. Bu haqda parlament matbuot xizmati tarqatgan yalpi majlis kun tartibiga tayanib, Tengrinews xabar berdi.
Deputatlar kun tartibida ko‘rsatilgan “Qozog‘iston respublikasining birinchi prezidenti — elboshi to‘g‘risida”gi konstitutsiyaviy qonunni o‘z kuchini yo‘qotgan deb topish to‘g‘risidagi qonun loyihasini ko‘rib chiqmoqda.
Xususan, mamlakat konstitutsiyasining 46-moddasidan birinchi prezidentning maqomi va vakolatlari konstitutsiya va tegishli konstitutsiyaviy qonun bilan belgilanadi, degan bandni olib tashlash rejalashtirilmoqda. Hozirda Nazarboyevni prezidentlik davrida qilgan harakatlari uchun javobgarlikka tortish mumkin emas. Shuningdek, uni ushlab turish, hibsga olish va qamoqda saqlash, tintuv yoki so‘roq qilish mumkin emas.
2022-yil yanvar oyida Qozog‘istonda gaz yonilg‘isi narxining keskin oshishi tufayli norozilik namoyishlari bo‘lib o‘tdi, biroq tez orada iqtisodiy sabablar siyosiy sabablarga aylanib ketdi. Xususan, namoyishchilar Nazarboyevdan siyosatni tark etishni talab qildi. Natijada sobiq prezident bir qator lavozimlaridan ayrildi va konstitutsiyaning yangi tahriridan unga tegishli barcha havolalar olib tashlandi.
Izoh (0)