Қозоғистон Сенати коррупцияга қарши кураш бўйича учта кодекс ва саккизта қонунга тузатишлар киритиб, харажати расмий даромаддан юқори бўлган мансабдорларни ишдан бўшатиш тўғрисидаги ўзгартиришни қабул қилди. Бу ҳақда «Орда.кз» хабар берди.
Сенат «Коррупцияга қарши курашиш ва давлат муҳофазасига олинган шахслар хавфсизлигини таъминлаш тўғрисида»ги қонун лойиҳасини қабул қилди. Унга кўра, декларациялардаги номувофиқликлар учун санкциялар белгиланди.
«Мансабдор шахснинг харажатлари ва даромадларидаги фарқ 1 000 ойлик ҳисоб кўрсаткичидан ошса, ‘фискал санкция’ қўлланилади, яъни даромаддаги фарқнинг 90 фоизи маъмурий жарима тариқасида қайтарилади», — дейди Қозоғистон Коррупцияга қарши кураш агентлиги раиси ўринбосари Улан Сарқулов.
Агар бу фарқ давлат хизматчисининг йиллик даромадидан ошса, «мансаб жаримаси» кўриб чиқилади: шахснинг уч йил давомида давлат хизматида фаолият юритиши бекор қилинади. Шу билан бирга, ҳар бир ҳолатда мансабдор шахсга харажатларнинг қонунийлигини асослаш имконияти берилади.
Тасдиқланган қарор аҳолини декларация билан тўлиқ қамраб олишни ҳисобга олган ҳолда 2027 йилдан кучга киради.
Аввалроқ Қозоғистон парламенти Назарбоев тўғрисидаги қонунни бекор қилиш масаласини кўриб чиқаётгани маълум қилинган. Мамлакат конституциясининг 46-моддасидан биринчи президентнинг мақоми ва ваколатлари конституция ва тегишли конституциявий қонун билан белгиланади, деган бандни олиб ташлаш режалаштирилмоқда. Ҳозирда Назарбоевни президентлик даврида қилган ҳаракатлари учун жавобгарликка тортиш мумкин эмас. Шунингдек, уни ушлаб туриш, ҳибсга олиш ва қамоқда сақлаш, тинтув ёки сўроқ қилиш мумкин эмас.
Изоҳ (0)