NASA Amerikaning SpaceX kompaniyasidan Xalqaro kosmik stansiyada shikastlangan rus “Soyuz” kosmik kemasida qolib ketgan astronavtlarni qutqarishni so‘radi, deb xabar bermoqda Reuters.
14-dekabr kuni Rossiyaning “Soyuz” kemasi qoplamasi shikastlangani sababli undan sovutish suyuqligi sizib chiqib ketishni boshlagandi. Bu paytda bortda uch astronavt bo‘lgan — biri amerikalik, ikki nafari rossiyalik, ular sentabr oyida XKSga olti oylik missiyani bajarish uchun ketgandi.
Hozir ularning shikastlangan “Soyuz” kapsulasi XKSga tutashtirilgan holda turibdi. Astronavtlar kemada harorat ko‘tarilmasligi uchun stansiyaga qaragan lyukni ochiq saqlamoqda. Rossiyaning boshqariladigan kosmik dasturlari rahbari Sergey Krikalevning aytishicha, agar lyuk yopilsa, kapsulada harorat tez ko‘tarilib ketadi.
XKSda hozir yana bir kema — SpaceXning Crew Dragon’i bor. Unda stansiyaga yana to‘rt nafar astronavt uchib ketgan. NASA SpaceX’dan “Soyuz” ekipajini Yerga qaytarishni so‘ramoqda. Ammo muammo shundaki, kemada faqat to‘rtta o‘rindiq bor.
“Roskosmos” uch kosmonavtni qanday qutqarish haqida bosh qotirayotganini ma’lum qilgan. Ularning ortidan yana bir “Soyuz” kemasini jo‘natish rejalashtirilgan edi. Ammo yakuniy qaror yanvar oyiga qoldirildi.
Izoh (0)