Serbiya prezidenti Aleksandr Vuchich shimoliy Kosovodagi serblar chegara o‘tish joylarini to‘sib qo‘ygan barrikadalarni buzib tashlashga kirishishini ma’lum qildi.
Bu haqda Belgrad va Kosovodagi serb yetakchilarining inqirozga oid uchrashuvidan keyin e’lon qilindi. Namoyishchilar Kosovo shimolida 10 dan ortiq barrikadalar o‘rnatgan, ularni butunlay yo‘q qilish uchun ikki kungacha vaqt ketishi mumkin.
“Bu oson jarayon emas va uni ba’zilar aytganidek, ikki soatda yakunlab bo‘lmaydi. 24-48 soat ichida to‘siqlar olib tashlanadi”, — dedi Vuchich.
Kosovodagi vaziyat hukumatning respublika hududida faqat mahalliy avtoraqamlar bilan yurish haqidagi talablari tufayli keskinlashishni boshladi. Noyabrda mahalliy hukumat serb raqamlaridan foydalanganlik uchun jarima solishga va’da berdi. Asosan serblar istiqomat qiladigan Kosovo shimolida barrikadalar paydo bo‘ldi, mahalliy aholi chegara punktlariga olib boradigan yo‘llarni to‘sib qo‘ya boshladi.
Dekabr o‘rtalarida Kosovo hukumati barrikadalarni olib tashlashni talab qildi, bosh vazir Albin Kurti Kosovo xavfsizlik kuchlari to‘siqlarni o‘zlari demontaj qilishi mumkinligini istisno qilmadi.
26-dekabrga o‘tar kechasi Serbiya va Kosovo chegarasidagi Zubin-Potok shahri hududida NATO kuchlari patruli yaqinida otishma yuz berdi, hech kim jabrlanmadi. Serbiya bosh shtabi boshlig‘i Milan Moysilovich chegara yaqinidagi Rashku shahriga jo‘nab ketdi. U vaziyatni murakkab deb atab, Kosovo bilan chegaraga serb harbiylarini joylashtirishga ehtiyoj borligini aytdi. Serbiya qo‘shinlari shay holatga keltirildi.
Izoh (0)