Германия собиқ канцлери Ангела Меркелнинг фикрича, Россия-Украина низоси музокаралар билан якунланади. Вазиятни тартибга солиш жараёнидаги эҳтимолий иштироки ҳақидаги саволга жавоб берар экан, бу масала кун тартибида йўқлигини айтди. Меркелнинг фикрича, унинг Россияга нисбатан сиёсати оқилона бўлган, чунки у «ҳозиргига ўхшаган уруш»нинг олдини олишга қаратилган эди.
Меркель айтишича, Украинадаги низо айнан қандай якунланишини билмайди. «Қачондир музокаралар орқали тугайди. Урушлар музокаралар столи атрофида якунланади. Мажбуран қабул қилдирилган сулҳ билан (буни бошқа кўпчилик қатори мен ҳам истамайман) очиқ ва дўстона суҳбат ўртасида фарқ бор». Бошқа ҳеч нарса қўшимча қилмоқчи эмасман», — деди собиқ канцлер Corriere della Sera Sette журналига берган интервьюсида.
Ангела Меркелнинг фикрича, канцлер лавозимида у Россия билан ҳамкорлик борасида «мантиққа асосланиб» қарорлар қабул қилган ва бу мантиқни у ҳалигача оқилона деб ҳисоблайди. «Гап ҳозиргига ўхшаган урушнинг олдини олиш ҳақида борганди. Бу амалга ошмагани бунга уриниб кўриш хато иш бўлганини англатмайди», — дея қўшиб қўйди у.
Германиянинг собиқ канцлери Ангела Меркель 7 декабрь куни Zeit нашрига берган интервьюсида Минск келишувлари «Украинага вақт бериш» учун керак бўлгани, Киев эса бу келишувлардан «кучлироқ бўлиш учун» фойдаланганини айтганди. Кремль Минск келишувлари «вақтни чўзиш» деган фикрга қўшилган. Россия президенти Владимир Путин Меркелнинг сўзларини кутилмаган ва ҳафсалани пир қиладиган деб топди. «Афтидан, ҳеч ким Минск келишувларининг барчасини бажармоқчи эмас», — деди у. Аммо Путиннинг айтишича, Меркелнинг сўзлари Украинада «махсус операция» ўтказиш тўғрисидаги қарорнинг тўғрилигидан далолат беради. Унинг фикрича, Германия собиқ канцлерининг гаплари РФга нисбатан алдовни исботлаб беради. «Мақсад фақат Украинани қурол-яроғ билан таъминлаб, жанговар ҳаракатларга тайёрлашдан иборат бўлгани» энди тушунарли бўлди, деган эди у.
Минск келишувлари 2014—2015 йилларда Донбассдаги вазиятни тартибга солиш бўйича Уч томонлама алоқа гуруҳи томонидан қабул қилинган. Унинг таркибига Россия, Украина ва Европа хавфсизлик ва ҳамкорлик ташкилоти вакиллари кирган. Битимларни Россия, Украина, Франция президентлари ва Германия канцлери (ўша пайтда Меркель эди) қўллаб-қувватлаган. 2022 йилнинг октябрь ойида Россия собиқ бош вазири Сергей Степашин Меркель Путинни Минск келишувларини имзолашга «кўндирган асосий сиёсатчи» бўлганини айтганди.
Изоҳ (0)