Xitoyda koronavirusga chalinish holatlari ko‘paygani sababli Yaponiya 30-dekabrdan boshlab Xitoydan kelayotganlar uchun chegara nazoratini kuchaytiradi. Bu haqda Yaponiya bosh vaziri Fumio Kisida jurnalistlarga ma’lum qildi, deb yozadi Japan Times.
Bosh vazirning aytishicha, Xitoydan kelgan barcha sayyohlar va so‘nggi yetti kun ichida Xitoy materigida bo‘lgan har bir kishi Yaponiyaga kelganida COVID-19 uchun testdan o‘tadi. Virus aniqlanganlar bir haftalik karantinga yuboriladi. COVID-19 infeksiyasining keskin o‘sishiga yo‘l qo‘ymaslik uchun Xitoydan parvozlar soni nazorat qilinadi.
Yaponiya ikki yarim yillik cheklovlardan so‘ng oktabr oyida chet ellik sayyohlar uchun chegaralarini ochgan edi.
Xitoy bo‘lsa rekord darajadagi kasallanishlarga qaramay, 8-yanvardan mamlakatga kirib keluvchilar uchun karantinni bekor qilmoqchi. Xitoyda koronavirusning joriy to‘lqini yanvar oyida o‘z cho‘qqisiga chiqishi kutilmoqda, deb yozadi Bloomberg.
Izoh (0)