Rossiyaning Perm davlat universitetida 2021-yil 20-sentabrda olti kishini otib o‘ldirgan Timur Bekmansurov umrbod qamoq jazosiga hukm qilindi. Bu haqda “RIA Novosti” xabar berdi.
Qaror 28-dekabr kuni Perm viloyat sudi tomonidan qabul qilindi. Bekmansurov ikki yoki undan ortiq odamni o‘ldirish va suiqasd qilish, huquq-tartibot organi xodimining hayotiga tajovuz qilish, birovning mulkiga qasddan zarar yetkazish kabi oltita band bo‘yicha aybdor deb topildi.
Bekmansurov barcha moddalar bo‘yicha o‘z aybiga iqror bo‘ldi, biroq suddan tergov bilan faol hamkorlik qilgani va nogironligi sabab, unga nisbatan yuqori jazo tayinlanmaslikni so‘radi. Hibsga olish vaqtida u jarohat olgan, shu sababli chap oyog‘i kesilgandi.
“Sud Bekmansurovning yoshligi, jazoni yengillashtiruvchi holatlari va ijobiy jihatlariga qaramay, umrbod ozodlikdan mahrum qilish jazosining dastlabki uch yilini qamoqda, qolgan muddatini esa koloniyalarda o‘tashi kerak degan xulosaga keldi”, — deydi sudya.
Shuningdek, ayblanuvchi halok bo‘lganlar va jarohatlanganlarning oilalariga 18 million 300 ming rubl tovon puli to‘lashi kerak.
2021-yilning 20-sentabr kuni Timur Bekmansurov o‘zi tahsil olayotgan Perm davlat milliy tadqiqot universiteti hududida otishma sodir etgandi. Hodisa oqibatida olti kishi halok bo‘lgan, 40 dan ortiq odam jarohatlangan. Hibsga olish vaqtida Bekmansurov yaralangan, keyinroq jarohati oqibatida uning oyog‘i kesib tashlangan.
Mavzuga doir
Izoh (0)