Ispaniyada media futbol ligasi tashkil qilinadi.
Kings League (“Qirollar ligasi”) deb nomlangan loyiha asoschilari “Barselona” sobiq himoyachisi Xerard Pike va mashhur ispaniyalik inflyuenser Ibai Lyanos hisoblanadi.
Turnirda 12 ta jamoa ishtirok etadi, o‘yinlar 7x7 formatda o‘tkaziladi.
Mashhur blogerlar, “yutuber”lar, jurnalistlar va futbol yulduzlari klublarga prezident bo‘ladi. Sobiq futbolchi Serxio Aguero o‘zining Kunisports deb nomlangan jamoasi bilan ishtirok etsa, darvozabon Iker Kasilyas esa “1K” jamoasini boshqaradi.
“Qirollar ligasi” yaratuvchilari an’anaviy futbol qoidalaridan foydalanib, undan tashqari boshqa sport turlaridan ham ba’zi elementlarni qo‘shib olmoqchi. Masalan, draft.
Draft — tanlash tizimi bo‘lib, musobaqa oldidan klublar mavjud o‘yinchilarni navbatma-navbat tanlab oladi. Bu tizimdan asosan kuchli o‘yinchilar bitta jamoaga yig‘ilib qolishini oldini olish uchun qo‘llaniladi.
Har bir jamoada 12 nafar o‘yinchi bo‘ladi. Ularning 10 nafari 27-dekabr kungi draftda tanlab olinadi. 11-o‘yinchi esa klub prezidenti tomonidan butun mavsum uchun tanlanadi. 12-o‘yinchi muntazam ravishda o‘zgarib turadi.
Musobaqada Chicharito, Ruben de la Red, Raul Tamudo va boshqa mashhur futbolchilar ishtirok etishi kutilmoqda.
“Qirollar ligasi”ga 2023-yil 1-yanvar kuni start beriladi.
Izoh (0)