Xalq taʼlimi vaziri jamgʻarmasi ustamasi uchun oʻtkazilgan sinovda 100 ballik natijalar qayd etildi

DTM 27-dekabr kuni Xalq taʼlimi vaziri jamgʻarmasi hisobidan har oylik ustamaga daʼvogar pedagoglarning saralash imtihonlari javoblarini eʼlon qildi.

Vazirlik axborot xizmati ushbu testlardan 100 foizlik natijani qayd etgan ustozlar bilan yaqinroq tanishish maqsadida suhbat uyushtirdi. 

14 yildan beri oʻquvchilarga bilim berayotgan Dilbarxon Gʻulomova oʻquvchilik davridanoq Respublika olimpiadalarida gʻoliblikni qoʻlga kiritib, Oʻzbekiston Milliy universitetiga imtiyoz asosida oʻqishga qabul qilingan.

U 2018-yil “Yil oʻqituvchisi” respublika koʻrik tanlovining 3-oʻrin sohibi boʻlgan. 2021-yil “El-yurt umidi” jamgʻarmasi ning stipendiati sifatida Sankt- Peterburgning A.I.Gersen nomidagi Pedagogika universitetida malaka oshirib qaytgan. 

Dilbar Gʻulomovaning oʻquvchilari ham biologiya fanidan viloyat olimpiadalarida gʻoliblikli qoʻlga kiritib, Tibbiyot oliygohlariga yuqori ball bilan oʻqishga qabul qilinmoqda. 

“Vazir jamgʻarmasiga eʼlon boʻlganidayoq bu ustama aniq meniki boʻlishiga ishongandim va nasib qilsa keyingi bosqichdan ham muvafaqqiyatli oʻtsam, niyatimga yetaman. Ustozlarga oʻz ustilarida ishlashdan tinmasliklarini, bu oʻzining ijobiy samarasini berishini ishonch bilan ayta olaman”, — deydi u.

Ikkinchi qahramon — Sevara Matniyozova. U Xalq taʼlimi vaziri jamgʻarmasidan ustama olish uchun oʻtkaziladigan sinov jarayonlarida muvaffaqiyatli ishtirok etib, 100 ballik natijani qoʻlga kiritgan oʻqituvchilardan. 

Tuproqqalʼa tumanidagi 8-maktabning ona tili va adabiyot fani oʻqituvchisining yutugʻi maktab jamoasi uchun ham haqiqiy xushxabar boʻldi. Oliy toifali, bilimli, tajribali ustoz bu natijaga osonlikcha erishgani yoʻq. Oʻz ustida tinimsiz ishlab, izlangan ustoz mehnatlari samarasini sinov jarayoning 1-bosqichidayoq namoyon eta oldi.

“Xalq taʼlimi vaziri jamgʻarmasi laureati boʻlish uchun bir necha kun yoki oy tayyorgarlik koʻrib erishib boʻlmaydi. 100 ballik natijaga yillar davomida oʻz ustimda ishlashim, bilimlarimni muntazam ravishda yangilab borishim orqali erishdim. Bu muvaffaqiyatga erishishimda har yili 5-11-sinf darsliklarni qayta-qayta oʻqib- oʻrganishim asosiy sabab boʻldi. Oʻrganish jarayonida yangilariga kiritilgan mavzularni diqqat bilan oʻzlashtirdim. 

Birinchi bosqich sinovlarida aynan oʻrganganlarim asosida javob berdim. Toʻgʻri avvaliga, nomzodlar belgilangan darajadan past koʻrsatkich qayd etsa, keyingi bosqichga oʻta olmaydi, degan xavotir ham yoʻq emasdi. Lekin sinovlarda yuqori natijani qoʻlga kiritaman degan ishonch meni hech ham tark etmadi va bilimlarim bilan yuksak natijaga erishdim!” — deydi Xalq taʼlimi aʼlochisi Sevara Matniyozova.

Shuningdek, Toyloq tumanidagi 57-umumtaʼlim maktabining matematika fani oʻqituvchisi Akmal Mansurov 100 foizlik natijani qayd etdi. 

Akmal Mansurov 2011-yilda Samarqand Davlat universitetining matematika fakultetini, 2013-yil shu oliygohning magistraturasini tamomlagan. 

U 2022-yil davlatimiz rahbari tomonidan “Oʻzbekiston Konstitutsiyasining 30 yilligi” koʻkrak nishoni bilan taqdirlangan.

Pedagogning 500 ga yaqin oʻquvchilari oliygohlariga yuqori ball bilan oʻqishga qabul qilingan. Oʻqituvchining taʼkidlashicha, u 2019-yilda qoʻlga kiritgan “Milliy sertifikat” tufayli oylik maoshiga 20 foiz ustama olib kelgan. 

“Oʻzimga ishonardim. Vazir jamgʻarmasi uchun tashkil etilgan imtihonlarni shaffof tashkil etganligini uchun tashkilotchilarga tashakkur! Bugun mamlakatimizda bilimga, aqliy mehnat bilan shugʻullanayotgan fuqarolarimizni  qoʻllab-quvvatlanayotganligidan xursandman. Kelajakda oʻz ustimda ishlab, taʼlim sifatini oshirishga vaʼda beraman. Vazir jamgʻarmasining ikkinchi bosqichidan muvaffaqiyatli oʻtsam 1000 dollar maosh olaman”, — deydi u.