O‘zbekiston davlat budjetida bir necha yillardan beri taqchillik kuzatib kelinadi. Defitsit kelasi yilda ham davom etishi aytilmoqda. Bugun, 27-dekabr kuni Senatda ko‘rib chiqilgan 2023-yil uchun mo‘ljallangan davlat budjetiga oid qonun muhokamasida ushbu masala tilga olindi.
Foto: Senat
Parlament yuqori palatasi raisi Tanzila Norboyeva budjetda taqchillik kuzatilayotgani, ammo shunday holatda ham ijtimoiy yo‘nalishlarga ajratiladigan mablag‘lar hajmi kamaymasligini aytdi.
“Davlat budjetini shakllantirishda har bir masala sinchiklab o‘rganilgan, har bir band chuqur tahlillarga asoslangan. Barcha muhim jihatlar e’tiborga olingan.
Budjet defitsit (3 foiz) bilan shakllantirilganiga qaramasdan, bu gal ham ijtimoiy yo‘nalishlarga ustuvor ahamiyat qaratilganini e’tirof etishimiz kerak. Bu yo‘nalishga qariyb 130 trillion so‘m ajratilmoqda, jumladan, ta’limga 58,4 trillion so‘m, sog‘liqni saqlashga 28,4 trillion so‘m, ijtimoiy nafaqa va ijtimoiy ta’minotga 33,1 trillion so‘m yo‘naltiriladi. Bu juda muhim jihat. Ijtimoiy soha bu, avvalo, inson qadri degani. Umuman olganda, davlat budjetini shakllantirishning birorta bosqichida ijtimoiy xarajatlarni qisqartirish masalasi kun tartibida bo‘lmagan. Qaytaga xalqimiz ehtiyojlarini qondirishga ustuvor ahamiyat qaratilgan”, — dedi Senat raisi.
Majlisda Tanzila Norboyeva Senat olib borgan o‘rganishlarda aniqlangan va aynan budjet orqali hal qilinadigan masalalar davlat budjetida inobatga olinganini ta’kidladi.
“Joriy yilda senatorlarimiz tomonidan hududlarni ijtimoiy-iqtisodiy rivojlantirish, aholining haqli e’tirozlariga sabab bo‘layotgan masalalarni o‘rganish davomida umumiy qiymati 2,5 trillion so‘mlik qariyb mingga yaqin muammoli (kanalizatsiya tarmoqlarini qurish va ta’mirlash, aholiga tibbiy xizmat sifatini oshirish) masala aniqlanib, hukumatga kiritilgan edi. Barcha takliflarimiz atroflicha o‘rganilib, ularni hal qilish uchun 800 milliard so‘mga yaqin mablag‘ ajratilishi belgilandi va ushbu mablag‘lar bugun siz bilan birga muhokama qilayotgan 2023-yilgi davlat budjetida aks ettirildi”, — dedi parlament rasmiysi.
Avvalroq Senat 2023-yilga mo‘ljallangan davlat budjetini ma’qullagani xabar qilingandi.
Izoh (0)