Toshkent va Sirdaryo viloyatlarida yuqori kuchlanishli elektr uzatish tarmoqlarini qurish bo‘yicha o‘tkazilgan xalqaro tender g‘oliblari aniqlandi. Bu haqda Energetika vazirligi matbuot xizmati xabar berdi.
Unga ko‘ra, Turkiyaning Şa-ra Enerji Īnşaat, Ticaret ve Sanayi A.Ş. kompaniyasi 31,89 mln dollar miqdoridagi taklif etilgan narx bilan uzunligi 213 km bo‘lgan 220 kV kuchlanishli elektr uzatish tarmoqlarini qurish bo‘yicha g‘olib deb topildi.
Shuningdek, Xitoyning Xian Electric Engineering Co, Ltd kompaniyasi 14,68 mln dollar miqdoridagi taklif etilgan narx bilan uzunligi 72 km bo‘lgan 500 kV kuchlanishli elektr uzatish tarmoqlarini qurish bo‘yicha g‘olib deb topildi.
Ma’lumotlarga ko‘ra, g‘olib kompaniyalar bilan muzokaralar o‘tkazilib, 2022-yil 23-dekabr kuni shartnomalar imzolangan.
Loyiha Jahon banki tomonidan moliyalashtirilgan bo‘lib, 2022—2024 yillarda amalga oshirilishi belgilangan.
Loyiha Sirdaryo va Toshkent viloyatlari hamda Toshkent shahrining elektr energiyasi ta’minoti ishonchliligi oshirilishiga, energotizimning Toshkent qismida magistral elektr tarmoqlari yuklamalarini kamayishiga va ularning o‘tkazuvchanlik qobiliyatini kelgusidagi talablarga mos holda bo‘lishiga xizmat qiladi.
Izoh (0)