Bosh vazirning moliya-iqtisodiyot va kambag‘allikni qisqartirish masalalari bo‘yicha o‘rinbosari — iqtisodiy taraqqiyot va kambag‘allikni qisqartirish vaziri Jamshid Qo‘chqorov hokim yordamchilari bilan bog‘liq jarayonda xato-kamchiliklar borligini tan oldi. Bu haqda u hokim yordamchilari faoliyati va istiqboldagi vazifalariga bag‘ishlangan matbuot anjumanida ma’lum qildi, deya xabar berdi “Daryo” muxbiri.
Tizimdagi kamchiliklarni tan olamiz va tanqidni to‘g‘ri qabul qilamiz, — dedi iqtisodiy taraqqiyot va kambag‘allikni qisqartirish vaziri Jamshid Qo‘chqorov.
Matbuot anjumanida so‘z olgan “Daryo” muxbiri hokim yordamchilari faoliyatini baholashda ballik tizimga e’tibor qaratilayotgani va eng yuqori ball oilaviy korxona tashkil qilgan hokim yordamchilariga berilishini aytib, bu tizim oilaviy korxonalar faoliyati rivojlanishi qiyin bo‘lgan chekka hududlarda oilaviy korxonalar nomiga tashkil etilishiga sabab bo‘layotganini aytdi va prezident Shavkat Mirziyoyevning Oliy Majlisga murojaatnomasida aytilganidek, hokimlarga topshiriq berishda hududlar imkoniyati hisobga olinishi aytilgani kabi hokim yordamchilariga topshiriq berish, ularning faoliyatini baholashda ham hududdan kelib chiqish adolatli bo‘larmidi, deya savol berdi.
Mazkur savolga javob bergan Jamshid Qo‘chqorov haqiqatan ham hokim yordamchilari faoliyatini baholashda xato-kamchliklarga yo‘l qo‘yilayotganini, ularning faoliyatini baholashda hududlar imkoniyati hisobga olinishi kerakligini tan oldi va 2023-yildan mazkur holatga e’tibor berilishini bildirdi.
Bizning yana bir kamchiliklarimizdan biri hokim yordamchilari faoliyatini baholashda ularning kasb-hunarga o‘qitishga yuborganliklarini ham inobatga olganimiz bo‘lgan. Men ham ko‘pchilikni o‘qishga yuborishim mumkin, ammo uning o‘qish-o‘qimasligi bu ikkinchi masala-ku, ya’ni bu ma’lum bir natijaga yo‘nalmagan. Shu sabab hokim yordamchilari faoliyati baholanayotganda bu baholash mexanizmini chiqarib tashlasak, adolatli bo‘lar ekan. To‘g‘ri, kamchiliklarimiz yetarli. Ammo yana bir marta takrorlayman, biz kamchiliklarimizdan uyalmaymiz, tanqidni to‘g‘ri qabul qilamiz, — dedi Jamshid Qo‘chqorov.
Jamshid Qo‘chqorovning qo‘shimcha qilishicha, 2022-yil davomida respublika bo‘yicha faoliyat yurituvchi 9300 nafar hokim yordamchisidan 998 nafari ishdan olinib, almashtirilgan.
Izoh (0)