Халқ таълими вазири жамғармаси устамаси учун ўтказилган синовда 100 баллик натижалар қайд этилди

DTМ 27 декабрь куни Халқ таълими вазири жамғармаси ҳисобидан ҳар ойлик устамага даъвогар педагогларнинг саралаш имтиҳонлари жавобларини эълон қилди.

Вазирлик ахборот хизмати ушбу тестлардан 100 фоизлик натижани қайд этган устозлар билан яқинроқ танишиш мақсадида суҳбат уюштирди. 

14 йилдан бери ўқувчиларга билим бераётган Дилбархон Ғуломова ўқувчилик давриданоқ Республика олимпиадаларида ғолибликни қўлга киритиб, Ўзбекистон Миллий университетига имтиёз асосида ўқишга қабул қилинган.

У 2018 йил “Йил ўқитувчиси” республика кўрик танловининг 3-ўрин соҳиби бўлган. 2021 йил “Эл-юрт умиди” жамғармаси нинг стипендиати сифатида Санкт- Петербургнинг А.I.Герсен номидаги Педагогика университетида малака ошириб қайтган. 

Дилбар Ғуломованинг ўқувчилари ҳам биология фанидан вилоят олимпиадаларида ғолибликли қўлга киритиб, Тиббиёт олийгоҳларига юқори балл билан ўқишга қабул қилинмоқда. 

“Вазир жамғармасига эълон бўлганидаёқ бу устама аниқ меники бўлишига ишонгандим ва насиб қилса кейинги босқичдан ҳам мувафаққиятли ўцам, ниятимга етаман. Устозларга ўз устиларида ишлашдан тинмасликларини, бу ўзининг ижобий самарасини беришини ишонч билан айта оламан”, — дейди у.

Иккинчи қаҳрамон — Севара Матниёзова. У Халқ таълими вазири жамғармасидан устама олиш учун ўтказиладиган синов жараёнларида муваффақиятли иштирок этиб, 100 баллик натижани қўлга киритган ўқитувчилардан. 

Тупроққалъа туманидаги 8-мактабнинг она тили ва адабиёт фани ўқитувчисининг ютуғи мактаб жамоаси учун ҳам ҳақиқий хушхабар бўлди. Олий тоифали, билимли, тажрибали устоз бу натижага осонликча эришгани йўқ. Ўз устида тинимсиз ишлаб, изланган устоз меҳнатлари самарасини синов жараёнинг 1-босқичидаёқ намоён эта олди.

“Халқ таълими вазири жамғармаси лауреати бўлиш учун бир неча кун ёки ой тайёргарлик кўриб эришиб бўлмайди. 100 баллик натижага йиллар давомида ўз устимда ишлашим, билимларимни мунтазам равишда янгилаб боришим орқали эришдим. Бу муваффақиятга эришишимда ҳар йили 5-11-синф дарсликларни қайта-қайта ўқиб- ўрганишим асосий сабаб бўлди. Ўрганиш жараёнида янгиларига киритилган мавзуларни диққат билан ўзлаштирдим. 

Биринчи босқич синовларида айнан ўрганганларим асосида жавоб бердим. Тўғри аввалига, номзодлар белгиланган даражадан паст кўрсаткич қайд этса, кейинги босқичга ўта олмайди, деган хавотир ҳам йўқ эмасди. Лекин синовларда юқори натижани қўлга киритаман деган ишонч мени ҳеч ҳам тарк этмади ва билимларим билан юксак натижага эришдим!” — дейди Халқ таълими аълочиси Севара Матниёзова.

Шунингдек, Тойлоқ туманидаги 57-умумтаълим мактабининг математика фани ўқитувчиси Акмал Мансуров 100 фоизлик натижани қайд этди. 

Акмал Мансуров 2011 йилда Самарқанд Давлат университетининг математика факультетини, 2013 йил шу олийгоҳнинг магистратурасини тамомлаган. 

У 2022 йил давлатимиз раҳбари томонидан “Ўзбекистон Конституциясининг 30 йиллиги” кўкрак нишони билан тақдирланган.

Педагогнинг 500 га яқин ўқувчилари олийгоҳларига юқори балл билан ўқишга қабул қилинган. Ўқитувчининг таъкидлашича, у 2019 йилда қўлга киритган “Миллий сертификат” туфайли ойлик маошига 20 фоиз устама олиб келган. 

“Ўзимга ишонардим. Вазир жамғармаси учун ташкил этилган имтиҳонларни шаффоф ташкил этганлигини учун ташкилотчиларга ташаккур! Бугун мамлакатимизда билимга, ақлий меҳнат билан шуғулланаётган фуқароларимизни  қўллаб-қувватланаётганлигидан хурсандман. Келажакда ўз устимда ишлаб, таълим сифатини оширишга ваъда бераман. Вазир жамғармасининг иккинчи босқичидан муваффақиятли ўцам 1000 доллар маош оламан”, — дейди у.