Eron afg‘on ayollariga ta’lim olishda yordam taklif qildi

“Tolibon” muvaqqat hukumati qarori bilan Afg‘onistonda ayollarning oliygohda o‘qishi taqiqlangach, Eron afg‘on ayollariga ta’lim olishda yordam berishga tayyorligini ma’lum qildi. Bu haqda Eronning oila va ayollar bo‘yicha vitse-prezidenti Ensiya Xazaliga tayanib, “RBK” xabar berdi.

“Eron afg‘onistonlik ayollarga ta’limning turli darajalarida o‘qishni davom ettirishda yordam berishga tayyor”, — deb yozgan u Twitter’da.

Avvalroq “Tolibon” hukumati Oliy ta’lim vazirligi Afg‘onistondagi xususiy va davlat universitetlarida talaba qizlarning o‘qishini to‘xtatishni buyurgandi. Afg‘oniston oliy ta’lim vaziri Neda Muhammad Nadimning aytishicha, qizlarning dunyoviy universitetlarda tahsil olishi islom qonunlariga va an’analariga zid.

Bu qaror G‘arb davlatlari bilan birga Saudiya Arabistoni, Qatar, Birlashgan Arab Amirliklari va Turkiya tomonidan ham qoralandi. Ular “Tolibon”ni bu qarorni bekor qilishga chaqirdi.

Biroz o‘tib “Tolibon” ayollarga nodavlat tashkilotlarida ishlashni ham taqiqladi.