Rossiya prezidenti Vladimir Putin, uning fikricha, rossiyaliklarning katta qismi o‘z mamlakati uchun “hamma narsadan voz kechishga” tayyorligini aytdi. Bu haqda prezident “Rossiya 1” telekanalida “Moskva. Kreml. Putin” dasturi boshlovchisining urush paytida Putinni nima hayratda qoldirgani haqidagi savoliga javoban gapirdi.
Kimdir o‘zini haqiqiy vatanparvarlardek tutmagani uchun ajablanishning keragi yo‘q. Chunki har qanday jamiyatda, avvalambor, shaxsiy manfaatini, qandaydir shaxsiy rejalarini o‘ylaydigan odamlar bor. Rostini aytsam, men ularni ayblamayman. Har bir inson tanlash huquqiga ega.Lekin asosiy qismga kelsak, 99,9 foiz fuqarolarimiz, xalqimiz vatan manfaati yo‘lida hamma narsadan kechishga tayyor, bu yerda men uchun g‘ayrioddiy narsa yo‘q. Bu meni Rossiya o‘zgacha davlat ekaniga yana bir bor ishontirdi. Odamlarimiz ham o‘zgacha. Bu Rossiyaning butun tarixi davomida tasdiqlangan va bugungi kunda yana bir bor tasdig‘ini topmoqda, — dedi Putin.
O‘sha intervyu davomida Putin Ukrainadagi urushdan maqsad rus xalqini birlashtirish ekanini aytgan. Uning da’vo qilishicha, Rossiya 2014-yildagi “davlat to‘ntarishi”dan keyin Ukrainada yashovchilarni “himoya qilishga” majbur bo‘lgan. U Ukrainadagi urush zamirida “geosiyosiy raqiblarning Rossiyani, tarixiy Rossiyani ajratib olishga qaratilgan siyosati” yotganini bildirdi.
Dekabr oyi boshida Vladimir Putinning 10 yildan beri har dekabrda o‘tkazib kelinayotgan katta matbuot anjumani 2022-yilda o‘tkazilmasligi ma’lum bo‘ldi. Britaniya mudofaa razvedkasi matbuot anjumani Rossiyaning Ukrainaga bostirib kirishi haqidagi “ruxsatsiz muhokama” qo‘rquvi tufayli bekor qilinganini taxmin qildi. Kreml shuningdek, bu yil Putin Federal Majlisga yillik murojaat bilan chiqmasligini e’lon qildi.
Izoh (0)