Hindiston Mudofaa vazirligi Xitoy va Pokiston chegaralariga joylashtirish uchun 120 ga yaqin Pralay ballistik raketalarini xarid qilishni tasdiqladi. Bu haqda The Economic Times xabar berdi.
Ayni paytda Pralay ballistik raketalari 150 dan 500 kilometrgacha masofadagi nishonlarga zarba beroladi. Uni qarshi tomonning mudofaa tizimlari bilan tutib olish juda qiyin.
“Mudofaa vazirligining yuqori darajadagi yig‘ilishida qurolli kuchlar uchun 120 ga yaqin raketa sotib olish va ularni chegaralar bo‘ylab joylashtirish masalalari aniqlandi”, deyiladi xabarda.
Raketalarni sotib olish hozirda ballistik raketalardan taktik rollarda foydalanishga ruxsat beruvchi siyosatga ega bo‘lgan mamlakat uchun katta rivojlanish sifatida qaralmoqda. Xitoyda ham, Pokistonda ham taktik rollar uchun mo‘ljallangan ballistik raketalar mavjud. Pralay raketasi 2021-yilning 21-dekabr va 22-dekabr kunlari ketma-ket ikki marta muvaffaqiyatli sinovdan o‘tkazilgan.
Pralay qattiq yoqilg‘i dvigatel va boshqa yangi texnologiyalar bilan jihozlangan. Raketalarni boshqarish tizimi zamonaviy navigatsiya va integratsiyalashgan avionikani o‘z ichiga oladi. Qurilma birinchi navbatda Hindiston havo kuchlari tomonidan qabul qilinadi.
Mudofaa kuzatuvchilari fikricha, bunday raketa tizimi dushmanning uzoq masofaga uchuvchi havo hujumidan mudofaa tizimlarini, shuningdek, boshqa qurollarini yo‘q qilish uchun ishlatilishi mumkin.
Ushbu raketalarni joriy etish taklifi mudofaa kuchlari dushman nishonlarini uzoq masofadan urib tushira oladigan maxsus raketa kuchlarini yaratish ustida ish olib borayotgan bir paytda ma’qullangan. Xitoy armiyasi allaqachon maxsus raketa kuchlariga ega.
Dekabr oyida Hindiston Xitoy bilan chegaraga “misli ko‘rilmagan” darajada ko‘p harbiylarini joylashtirgan. Bu “2020-yildan buyon sezilarli darajada ko‘paygan” Xitoy qo‘shinlari joylashtirilishiga qarshilik ko‘rsatish uchun qilinmoqda.
Izoh (0)