Qozog‘iston tashqi ishlar vaziri Muxtor Tleuberdi mamlakat Rossiyaga qarshi sanksiyalarga qo‘shilmasligini ma’lum qildi. Bu haqda Sputnik xabar berdi.
Siyosatchi Yaponiyaning NHK nashriga bergan intervyusida bu haqda ma’lumot bergan.
“Rossiya va Qozog‘iston o‘rtasida yaqin iqtisodiy aloqalar mavjud, shu sababli Rossiyaga qarshi sanksiyalar Qozog‘iston iqtisodiyotiga salbiy ta’sir ko‘rsatmoqda. Shu bilan birga, Qozog‘iston iqtisodiyoti turli korxonalar tomonidan cheklov choralarni chetlab o‘tish uchun foydalanilmaydi”, — dedi Tleuberdi.
Uning qo‘shimcha qilishicha, Ostona ham Moskva, ham Kiyev bilan do‘stona munosabatlarni saqlab turadi.
“Rossiya va Ukraina Qozog‘iston uchun tarixiy do‘st davlatlardir. Prezident To‘qayev har ikki davlat rahbarlari bilan muntazam muloqot qilib, ularni hozirgi mojaroga tinch va diplomatik yechim topish uchun muzokaralar stoliga o‘tirishga chaqiradi”, — deydi vazir.
Tleuberdi Qozog‘iston o‘zining qo‘shnilari, shuningdek, Yaponiya, AQSH, Yevropa Ittifoqi va boshqa yetakchi davlatlar bilan o‘zaro munosabatlarni rivojlantirishni istashini bildirdi.
Qozog‘iston TIV rahbari avval ham Rossiyaga nisbatan sanksiyalarga qo‘shilish va Moskva manfaatlariga tajovuz qiluvchi qadamlar qo‘yish niyatida emasligini ta’kidlagandi.
Izoh (0)