“O‘zbekiston bu muammo borligini tan olib, uni bartaraf etishga kirishgani ta’lim darajasini oshirish niyati jiddiy ekanidan dalolat”. Qozog‘istonlik deputat Saida Mirziyoyevaning o‘qituvchilarga oid tashabbusi haqida

Saida Mirziyoyevaning o‘qituvchilarni o‘z faoliyatiga bevosita aloqador bo‘lmagan ishdan butunlay ozod qilish tashabbusi turli mamlakatlarda siyosatchilar, jurnalistlar va jamoat arboblari tomonidan muhokama qilinmoqda. Bu borada Qozog‘istonning eng yirik — “Amanat” siyosiy partiyasi a’zosi, Chimkent shahri maslahatining VII chaqiriq deputati Murat Joldixojayev ham o‘z fikrlarini bildirdi.

“E’tiborimni O‘zbekistonda ham, xorijda ham keng muhokama qilingan, Saida Mirziyoyevaning o‘qituvchilarni himoya qilgan va hatto o‘qituvchilarni vazifasidan tashqari ishlarga jalb qilganlar uchun ma’muriy, ehtimolki, jinoiy javobgarlikka tortish joriy etilishi haqidagi nutqi o‘ziga tortdi.

Bu O‘zbekiston ushbu muammo borligini tan olib, uni bartaraf etishga kirishgani, ta’lim darajasi va sifatini oshirish niyati qanchalik jiddiy ekanidan dalolat beradi. Shavkat Mirziyoyev ham Oliy Majlisga murojaatnomasida bu masalaga katta e’tibor qaratganini barchamiz ko‘rdik.

Prezident kelgusi yilni ‘Insonga e’tibor va sifatli ta’lim yili’ deb nomlashni taklif qildi va bu bevosita o‘qituvchilarning mavqei, ularning sha’ni va qadr-qimmatini himoya qilish bilan bog‘liq”, — deb yozdi Joldixojayev o‘zining Facebookdagi sahifasida.

Shuningdek, deputat Qozog‘iston ham shunday muammolarga duch kelgani, buning natijasida 2019-yilda “O‘qituvchi maqomi to‘g‘risida”gi qonun qabul qilingani va bu amalda o‘zini yetarli darajada oqlaganini qayd etdi. Bu tajriba O‘zbekiston uchun ham foydali bo‘lishi mumkinligi ta’kidlandi.

Mavzuga doir:

• Saida Mirziyoyevaning o‘qituvchilar haqidagi tashabbusi MDHning qator davlatlari deputatlari tomonidan qo‘llab-quvvatlanmoqda
• “O‘qituvchilardan yillar davomida farrosh, komissiyaga xizmat ko‘rsatuvchi ofitsiant, bo‘sh zallarni to‘ldiruvchi ‘massovka’ sifatida foydalanildi” — Saida Mirziyoyeva